10-jeltoqsan kúni Táýelsizdik kúni qarsańynda Almatydaǵy Respýblıka saraıynda keshki saǵat 19.00-de qazaq estradasynyń maestrosy, sazger, Qazaqstannyń eńbek sińirgen qaıratkeri, A.Jubanov atyndaǵy daryndy balalarǵa arnalǵan respýblıka¬lyq qazaq mamandandyrylǵan mýzyka mektep-ınternatynyń estradalyq-sımfonıalyq orkestriniń kórkemdik jetekshisi, dırıjer, aranjırovka sheberi Nurlan Baıkózovtyń jeke shyǵarmashylyq keshi ótedi. Keshke Jubanysh Jeksenuly, Maqpal Júnisova, Baǵdat Sámedınova, Marjan Arapbaeva, M.Arynbaev, D.Seıitjanov, Saıa Mahanbetqyzy, E.Ábishev, «Jetigen», «Múzıkola» toptarymen qatar ózge de óner juldyzdary qatysady. Konsertten túsken qarjynyń bári qaırymdylyq maqsatta jumsalmaq. Nurlan Baıkózovtiń ónerdegi negizgi qadamdary stýdenttik kúnderi bastalǵan. 1973 jyly Shymkent mýzykalyq ýchılıshesinde júrip, «Stepnye makı» (Qyr qyzǵaldaqtary) dep atalatyn vokaldyq-aspapty ansámbl qurady. Arada bir jyl ótkende VIA «Stepnye makı» Máskeýde ótken baıqaýda jeńimpaz atanady. Qazaqtyń sırk ónerin tuńǵysh ret áýenmen órnektegen sazger búginde A.Jubanov atyndaǵy daryndy balalarǵa arnalǵan respýblıka¬lyq qazaq mamandandyrylǵan mýzyka mektep-ınternatynda estradalyq-sımfonıalyq orkestr quryp, onyń kórkemdik jetekshisi qyzmetin atqarýda.
Qazaqstan kompozıtorlar odaǵynyń múshesi Nurlan Baıkózov halyqtyń júreginen oryn alǵan talaı ánniń avtory retinde tanymal. Búginde ánderiniń sany 60-tan asqan. Halyq ony Maqpal Júnisovanyń oryndaýyndaǵy «Deme sen» ánimen jaqsy tanıdy, sonymen qatar Baǵdat Sámedınova, Qudaıbergen Bekishov, Eralhan Ábishov syndy óner ıeleri búginde Baıkózovtyń ánderin oryndap, kórermenge usynyp júr. Budan bólek, 50-den astam sımfonıalyq orkestrge jáne estradalyq sımfonıa orkestrlerine, ansámblderge arnalǵan shyǵarmalary bar. Onyń kópshiligi Eýropa elderiniń sahnasynda oryndalǵan.
«Shyǵarmashylyq keshimdi Táýelsizdik kúnine oraılastyrǵandy jón kórdim. Táýelsizdik – bizdiń eń basty armanymyz bolyp keldi. Demek, ony qadirleý, baǵasyn bilý bárimizdiń paryzymyz bolýy kerek dep sanaımyn», - deıdi sazger.
Anyqtama 1979-1984jj. «Gúlder » ansambiliniń bas dırıjery boldy. 1984-1988 jj. «Dos Muqasan» ansambliniń mýzykalyq jetekshisi. 1988-1992 jj. «Nazerke» ansambliniń kórkemdik jetekshisi. 1992-2010 jj. Almaty memlekettik sırk orkestriniń bas dırıjery. 2005-2012 jj. Almaty kalasy ákiminiń estrada-sımfonıalyq orkestriniń kórkemdik jetekshisi jáne bas dırıjery qyzmetterin atqarǵan.
