Qazaqstan men Mysyr elderi arasyndaǵy mádenı qarym-qatynastardy damytý maqsatynda Saǵadat Nurmaǵambetov atyndaǵy halyqaralyq qoǵamdyq qaıyrymdylyq qorynyń shaqyrtýymen Beıbarys Sultannyń tikeleı urpaǵy Samıa Beıbarys hanym Qazaqstannyń bas qalasy – Astanaǵa qonaqqa keldi dep habarlaıdy Qamshy.kz aqparat agenttigi QR Ulttyq mýzeıiniń baspasóz qyzmetine silteme jasap. Kúni keshe Qazaqstan Respýblıkasynyń Ulttyq mýzeıine arnaıy bas suǵyp, halyqaralyq kórmelerdi tamashalap, qazaq halqyna ǵana tán kóne jádigerler jáne elimizdiń salt-dástúrin nasıhattaıtyn aıryqsha dúnıelermen tanysty. Qonaqtar úshin halyqaralyq «Saqtar altyny» atty túpnusqa jádigerler kórmesine arnaıy ekskýrsıa uıymdastyryldy.

Sultan Beıbarys hanymnyń jumys joly 1993 jyly Arab Memleketteri Lıgasyn uıymdastyrýdan bastaldy. 2013 jyly LAS aqparattyq sektorynyń meńgerýshisi bolyp taǵaıyndaldy. Ol arab memleketteriniń Eýropamen qarym-qatynastaryn qadaǵalaıdy, sondaı-aq, arab-afrıka yntymaqtastyǵyn, arab-qytaı jáne arab-amerıka baılanystaryn nasıhattaýǵa jaýapty. Sonymen qatar, Samıa Beıbarys hanym «Arab isteri jýrnaly» bıznes-basylymynyń keńesshisi, Kaır ýnıversıtetiniń oqytýshysy bolyp qyzmet atqarady.

2017 jylǵy 10 tamyz kúni Qazaqstan Respýblıkasy Ulttyq mýzeıinde Arab memleketteri lıgasy (LAS) «Mádenıetaralyq dıalog» departamentiniń basshysy Samıa Beıbarys hanymnyń qatysýymen «Mysyrdyń mádenıeti men tarıhyndaǵy qypshaqtar men mámlúkter» atty dóńgelek ústel ótedi. İs-sharaǵa Ulttyq mýzeıdiń ǵylymı qyzmetkerleri, S.Y. Ysqaqov, Saǵadat Nurmaǵambetov atyndaǵy halyqaralyq qoǵamdyq-qaıyrymdylyq qorynyń Astana qalasy fılıalynyń prezıdenti, kórnekti qoǵam jáne memleket qaıratkerleri, Qazaqstan jáne Mysyr elderiniń ǵalymdary, BAQ ókilderi qatysady.