QR Úkimetiniń baspasóz ortalyǵynda ótken brıfıń barysynda energetıka vıse-mınıstri Baqytjan Jaqsalıev «Nurly jol» ınfraqurylymdy damytý memlekettik baǵdarlamasyn júzege asyrý týraly aıtyp berdi. Bul týraly Qamshy.kz aqparat agenttigi Premer-mınıstrdiń baspasóz qyzmetine silteme jasap habarlaıdy.   

Vıse-mınıstrdiń aıtýynsha, «Nurly jol» baǵdarlamasy aıasynda  500 kV Ekibastuz-SHúlbi GES (Semeı) – Óskemen jelisi qurylysy» jobasyn júzege asyrýdyń maqsaty Soltústik-SHyǵys qıylysyndaǵy jelilerdiń ótkizý qabiletin arttyrý, Reseı EEO jelisi arqyly elektr energıasynyń tasymaldaýyna baılanyssyz SHQO tapshylyǵyn jabýdy qamtamasyz etý jáne Bulaq GES kontrretteýishin engizýmen Shúlbi GES tolyq qýattylyǵyn berý bolyp tabylady. 

«Jobanyń júzege asyrylý merzimi: 2011–2017 jyldar. Joba quny – 53,3 mlrd. teńge. Qarjylandyrý tolyǵymen  KEGOC kompanıasynyń qarajaty esebinen júzege asyrylady. Búgingi tańda jobanyń barlyq qurylys-montaj jumystary tabysty aıaqtaldy», – dedi Baqytjan Jaqsalıev.

Salynǵan nysandardy iske qosý 2016 jyly 6 jeltoqsanda Memleket basshysynyń qatysýymen «Indýstrıalandyrý kúni» aıasynda ótken telekópir barysynda iske asyryldy. Jobanyń birinshi kezeńi boıynsha qurylys-montaj jumystary josparlanǵan 2017 jyldyń ornyna, 2016 jyly, kestesinen buryn aıaqtaldy. 

2018 jyly aıaqtalatyn taǵy bir joba - Aqtoǵaı–Taldyqorǵan–Almaty 500 kV SHGES elektr jelisiniń qurylysy. 

«Jobany júzege  asyrý Qazaqstannyń Soltústik-ońtústik baǵyty boıynsha ulttyq elektr jelisiniń tranzıttik áleýetin arttyrýǵa múmkindik beredi, elektrlendiriletin temirjol ýchaskeleriniń, energıa qajet taý-ken ónerkásibi nysandarynyń qajettilikterin jabýdy qamtamasyz etedi, shekara mańy terıtorıalaryn damytý jáne jańǵyrtylatyn energıa áleýmetin aýqymdy ıgerý úshin jaǵdaılar týdyrady, sonymen qatar Shyǵys aımaqtyń Qazaqstannyń biryńǵaı elektrjúıesimen baılanysyn kúsheıtedi», – dedi B. Jaqsalıev.