QR Premer-mınıstriniń birinshi orynbasary Asqar Mamın «Nurly jol» ınfraqurylymdy damytýdyń memlekettik baǵdarlamasyn iske asyrýmen tanysý úshin jumys saparymen Aqtóbe oblysyna bardy. Bul týraly Qamshy.kz aqparat agenttigi Premer-mınıstrdiń baspasóz qyzmetine silteme jasap habarlaıdy.

Óńirge kelgen Premer-mınıstrdiń birinshi orynbasaryna Aqtóbedegi áýejaıdyń ushyp-qoný jolaǵynyń burylys jobasy tanystyryldy. Óz kezeginde oblys ákimi Berdibek Saparbaev birinshi vıse-mınıstrdi Aqtóbedegi memlekettik-jekemenshik áriptestik jobalarymen tanystyrdy.

Atap aıtqanda, A.Mamın tek hokeıshilerdi ǵana emes, mánerlep syrǵanaý men short-trek boıynsha bolashaq chempıondardy da daıyndaıtyn «Olımp» hokeı modýlinde boldy. Aıta ketý kerek, bul táýelsizdik jyldarynda salynǵan qysqy sport túrin damytatyn alǵashqy sport ǵımaraty. Jýyrda quny 1,5 mlrd. teńge bolatyn jastar saraıy óz jumysyn bastamaq. Joba «SNPS-Aqtóbemunaıgaz» AQ-nyń áleýmettik jaýapkershiligi aıasynda júzege asyrylýda.

Budan ózge, birinshi vıse-premer jańa oqý jylynda aýyldan kelgen daryndy balalarǵa arnap ınternat ashatyn «Symbat» jekemenshik mektebin, sonymen qatar Qazaqstanda balamasy joq jetim balalarǵa arnalǵan quny 1,6 mlrd. teńge bolatyn «Meıirim» áleýmettik úıin qarap shyqty.

Sondaı-aq, A. Mamınniń nazaryna qurylysy men zamanaýı qural-jabdyqtarmen jaraqtanýyna 3,2 mlrd. teńge ınvestısıalanǵan «Kóz jaryǵy» oftolmologıalyq ortalyǵy usynyldy. 

Óńir úshin mańyzdy bolyp tabylatyn nysandar salynyp jatqan qurylys alańdaryn aralaý kezinde oblys ákimi Berdibek Saparbaev atalmysh nysandardyń júzege asyrylýy eń aldymen, oblys búdjetine túsetin salmaqty azaıtýǵa, qosymsha jumys oryndaryn qurýǵa, mektepke deıingi bilimmen qamtýdy, sonymen qatar medısınalyq qyzmet kórsetý sapasyn arttyrýǵa aıtarlyqtaı múmkindik beretinin atap ótti.

Budan ózge, birinshi vıse-premer qaıta qalpyna keltirilip jatqan «Aqtóbe-Orsk» avtokólik jolyn qarap shyǵyp, birqatar iri kásiporyndardyń qyzmetimen tanysty.

Sonymen, qýattylyǵy jylyna 50 myń tonna bolatyn «Qazaqstan munaı jabdyqtary zaýyty» JSHS munaı-gaz jabdyqtary men qubyrlaryn shyǵarýmen aınalysady. Jobanyń jalpy quny 5 mlrd. teńgeni quraıdy.

Elbasynyń halyqtyń ómir súrý deńgeıi men sapasyn arttyrý tapsyrmasyn oryndaý maqsatynda óńirde aýyldyq eldi mekenderdi gazdandyrý sharalary júrgizilýde. Osyǵan baılanysty Aqtóbede gaz taratýdy edáýir arttyrýǵa múmkindik beretin «AGRS 300» avtomattandyrylǵan gaz taratý beketi salyndy. Aıta ketý kerek, sońǵy eki jylda Aqtóbe oblysynyń gazdandyrý deńgeıi 60%-dan 87%-ǵa deıin artty.

Budan basqa, A. Mamın óz qyzmetin «QazAgroQarjy» AQ qoldaýymen IIDMB aıasynda júzege asyrylyp otyrǵan óńirdegi iri jylyjaı keshenderiniń biri «Grın Haýs Qazaqstan» seriktestiginde boldy. Jobany júzege asyrý oblystyń jańa pisken kókónisterge degen qajettiligin tolyqtaı qamtamasyz etýge, sonymen qatar artyq ónimdi Reseıge eksporttaýǵa múmkindik berdi.

Jylyjaıda Asqar Mamınge azyq-túlik qaýipsizdigin qamtamasyz etý, óńiraralyq kooperasıa men sýarmaly eginshilikti damytý boıynsha óńirde qoldanylyp jatqan sharalar týraly baıandaldy.

«Aqtóbe rels-arqalyq zaýyty» JSHS-de Asqar Mamındi óndiristiń qyzdyrý peshinen bastap daıyn ónimdi shyǵarýǵa deıingi tehnologıalyq prosesimen tanystyrdy. Eske salaıyq, joba Qazaqstannyń ındýstrıaldy-ınnovasıalyq damýy aıasynda júzege asyrylǵan.

Kásiporyn EEAS aýmaǵyndaǵy «R-65» standartty uzyn ólshemdi (120 m) ystyqqa beıimdelgen temirjol relsteriniń jalǵyz óndirýshisi bolyp tabylady. Jalpy zaýyt tolyq jobalyq qýattylyqqa shyqqan soń 2018 jyly jylyna 430 myń tonna prokat, sonyń ishinde joǵary jyldamdyqtaǵy magıstraldar úshin 200 myń tonna standartty uzyn ólshemdi ystyqqa beıimdelgen rels, qurylys sektory úshin 230 myń tonna fasondyq ónim shyǵaratyn bolady.