Shveısarıa Konfederasıanyń prezıdenti Dorıs Loıthard «EKSPO-2017» kórmesi aıasynda Shveısarıanyń ulttyq kúnin atap ótý sharalaryna qatysty dep habarlaıdy Qamshy.kz aqparat agenttigi QazAqparatqa silteme jasap.
«Bolashaq energıasy» taqyrybymen ótip jatqan «EKSPO-2017» kórmesi álemde turaqty bolashaqty qurýda negiz bola alady. Osy oraıda energıany, taza ekologıany qamatamasyz etý asa ózektilikke ıe. Bul baǵytta «EKSPO-2017» kórmesin ótkizý álemdik qoǵamdastyq úshin mańyzdy dep senimmen aıta alamyz. Osynda aldaǵy ýaqytta da jańa tehnologıamyzdy ary qaraı da keńinen tanystyrýǵa múmkindik bar, sebebi búginde Qazaqstan men Shveısarıa arasynda turaqty yntymaqtastyq ornaǵan», – dedi Loıthard.
Óz kezeginde QR Qarjy mınıstri Baqyt Sultanov atalǵan elden kelgen delegasıanyń sapary Qazaqstan men Shveısarıanyń arasyndaǵy dıplomatıalyq qatynastardyń 25 jyldyǵyn merekeleý jylynda ótip jatqandyǵyn sóz etti.
«Biz balamaly ári jańaratyn energıa kózderin damytý isine úlesin qosqan Shveısarıa Úkimeti men Sizdiń jeke eńbegińizdi joǵary baǵalaımyn. Shveısarıa halqy qabyldaǵan «Energetıkalyq strategıa – 2050» baǵdarlamasy «jasyl» ekonomıkany damytýǵa eleýli úles qosatyndyǵyna senimdemiz. Ózderińiz bilesizder, bul salany damytýǵa Qazaqstan da aıryqsha mán berip otyr. Jalpy, «EKSPO-2017» kórmesi álemdik qoǵamdastyqtyń jahandyq problemalaryn sheshý úshin álemdik alańǵa aınalatyndyǵy anyq», – dedi Sultanov.
Budan buryn habarlaǵanymyzdaı, búgin Astanadaǵy «EKSPO-2017» kórmesi aýmaǵynda Almaty oblysy men Shveısarıanyń Tıchıno kantony arasynda ózara yntymaqtastyq týraly memorandým jasaldy.
