Kókpar oıyny – arnaıy akredıtteýden ótken, QR Mádenıet jáne sport mınıstrliginiń jyldyq kúntizbelik josparyna engizilgen sporttyq oıyn túri. Kókpardan jyl saıyn eresekter, jastar jáne jasóspirimder arasyndaǵy Qazaqstan chempıonaty turaqty ótkiziledi. Qazirgi kezde elimizde kókparshylardyń 16 eresekter, 16 jastar jáne jasóspirimder komandasy bar.
Kókpardan 2013 jyly 11 memleket komandasy qatysqan Azıa chempıonaty uıymdastyrylǵan. Al, 2017 jylǵy tamyz aıynda Kókpardan İ Álem chempıonaty ótkizilmekshi.
Buǵan deıingi ýaqytta kókpar oıyndary úshin ár jarysqa birneshe tiri eshki-serkeler soıylyp, jarysta sol bas-sıraqtary alynyp tastalǵan eshkiler qoldanylatyn. Bıylǵy jyldan bastap barlyq kókpar oıyndaryna jasandy serkeler talap etile bastady.
Toqtarbek Kákim 2013 jyldan bastap osy jasandy serkeni ár túrli materıaldardan jasap ulttyq sport mamandaryna birneshe márte usynyp kórdi. Sońǵy jasalǵan jasandy serke varıanttarynyń biri 2016 jyly ótken «Túrki halyqtarynyń dástúrli sport túrleri halyqaralyq qaýymdastyǵynyń» halyqaralyq semınar-keńesinde talqylanǵan.
Sońǵy ret shilde aıynyń 14-i kúni Astana qalasyndaǵy «Qazanat» ıpodromynda ótken ulttyq sport mamandarynyń saraptaýynan ótip, kókpar oıynyna tolyq jaramdylyǵy maquldandy. Aldaǵy ýaqytta QR Ulttyq sport túrleri qaýymdastyǵy arqyly Toqtarbek Kákim jasaǵan jasandy serkege tapsyrys berile bastaıdy.
Jasandy serkeniń sıpattamasy:
Materıaly – kaýchýk jáne shynjyr temirler.
Kaýchýk – Qytaı jáne AQSH memleketteri óndirgen materıaldar qosyndysy.
Qattylyǵy – 40-50 paıyzdyq mólsherinde.
Ár jasandy serkeniń salmaǵy – 22 keli men 35 keli aralyǵynda.
Ereksheligi — ıilgish, batpaıtyn qasıetke ıe.
Erlan Tóleýbaı
