Ortalyq komýnıkasıalar qyzmetiniń alańynda Mańǵystaý oblysy ákiminiń orynbasary Maqsat Sqaqovtyń qatysýymen baspasóz konferensıa ótti dep habarlaıdy Qamshy.kz aqparat agenttigi Mańǵystaý oblysy ákiminiń baspasóz qyzmetine silteme jasap.
EKSPO-2017 halyqaralyq mamandandyrylǵan kórmesi aıasynda Mańǵystaý oblysynyń «Qart Kaspııden sálem al, erke Esil!» atty óner kúnderi ótedi. 15-18 tamyz aralyǵynda barlyǵy 38 mádenı shara ótedi dep josparlanyp otyr.
Mádenıet kúnderiniń ashylýy 15 tamyz kúni saǵat 21.30-da EKSPO alańyndaǵy amfıteatrda ótedi. Ashylýǵa Mańǵystaý oblysynyń ákimi Eraly Toǵjanov jáne 350 ónerpaz qatysady. Konserttik baǵdarlamada QR eńbek sińirgen qaıratkeri, Daryn syılyǵynyń laýreaty A.Qosanova, Tamara Asar, Kamshat Joldybaeva, Ǵalymjan Joldasbaı, Luqpan Joldasov óner kórsetedi.
16 tamyzda «Shabyt» shyǵarmashylyq saraıy Jambyl Jabaev atyndaǵy konsert zalynda saǵat 19.00-da QR Memlekettik syılyǵynyń laýreaty Esenǵalı Raýshanovtyń «Bizdiń eldiń jylqysy kil kókmoınaq» atty shyǵarmashylyq keshi ótedi. Keshke 53 ónerpaz qatyspaq.
17 tamyz kúni saǵat 16.00-de Etno-aýylda etnografıalyq teatrlandyrylǵan mádenı sharanyń ashylýy ótedi. Ulttyq salt-dástúr, ulttyq sporttyq oıyndar, at jarysy jáne t.b. Barlyǵy 273 ónerpaz qatysady.
Saǵat 19.30-21.00-de Daryn syılyǵynyń laýreaty Tamara Asar, Ǵalymjan Joldasbaı jáne «Jorǵa» halyqtyq bı ansambliniń fólklorlyq konserti ótedi . Keshke 65 ónerpaz qatysady.
Sol kúni saǵat 19.00-de Kongres-hollda Mańǵystaý oblystyq M.Óskinbaev atyndaǵy fılarmonıasy A.Taraquly atyndaǵy ult-aspaptar orkestriniń dástúrli án-kúı-jyr sazdarynyń konserti bolady. Oǵan 70 ártis qatysady.
18 tamyz kúni saǵat 19.00-de M.Gorkıı atyndaǵy memlekettik akademıalyq orys drama teatrynda N.Jantórın atyndaǵy oblystyq mýzykalyq-drama teatrynyń «Shyńyraý» spektakli ótedi. Barlyǵy 45 ártis qatysady dep josparlanýda.
Sonymen qatar 15-18 tamyz kúnderi Etno-aýyl aımaǵynda da túrli mádenı sharalar ótedi.
Jalpy, Astanadaǵy Mańǵystaýdyń mádenıet kúnderine barlyǵy 567 ónerpaz qatysady. Onyń 20-sy qolóner sheberleri, 233 kásibı ujymdar men ártister jáne 120 etnomádenı birlestikteriniń kórkem ónerpazdary.
