Bilim jáne ǵylym mınıstri Erlan Saǵadıev Qazaqstanda bilim granttary qalaı úlestirilgeni jaıly aıtty, – dep habarlaıdy Qamshy.kz aqparat agenttigi tengrinews.kz-ke silteme jasaı otyryp.
«JOO-larǵa qabyldaý erejeleri jaıly, halyqty alańdatqan suraqtarǵa toqtalyp ótkim keledi. Bıyl talqylap, sheshýimiz qajet. Birinshisi – mamandyqtar boıynsha granttardy úlestirý. Sebebi biz ekonomıkanyń áleýetti salalary boıynsha granttardy úlestiremiz. Mysaly, esepteý tehnıkasyna 610, al quqyqtanýǵa bar bolǵany 45, jalpy medısınaǵa 2500 jáne stomatologıaǵa 45. Bul túrli baǵdarlamalarda bekitilgen. Jyl saıyn joǵary bal alǵandar grantsyz qalyp jatyr, al az bal alǵandar basqa mamandyqtarǵa grant alyp jatyr», – dedi Saǵadıev úkimet otyrysynda.
Onyń pikirinshe, granttardy úlestirýdiń ekonomıkalyq turǵydaǵy oıǵa qonymdylyǵy áleýmettik ádildik máselesine kelip tireledi.
«Jyl saıyn bul ata-analardyń tarapynan kóptegen suraq týyndatyp jatyr. Bul – jańalyq emes, jyl saıyn proseske jańa urpaq pen tájirıbesi joq ata-analar men balalar kelip jatqanyn da eskerý qajet. Olar birinshi ret mundaıdan ótip otyr. Onyń ústine áleýetti mamandyqtar boıynsha granttar tizimi óte kesh shyǵady, bizde mınıstrlikter men ákimdiktermen kóp dúnıeni kelisý qajettigin jınaý júıesi aýyr. Talapker óz múmkindigin baǵamdaı almaıdy, oǵan profıldik pán tańdaýǵa jáne daıyndalýǵa úlgermeı jatady», – dedi QR BǴM basshysy.
Ol mınıstrliktiń osy másele boıynsha birneshe sheshimdi usynatynyn aıtyp ótti. Mysaly, belgili bir mamandyqtarǵa qansha grant bólinetinin aldyn ala úsh jylǵa shyǵaryp qoıý, ıaǵnı, úsh jyldyq búdjet aıasynda múmkin málimetterdi jarıalaý. Onyń aıtýynsha, bul máseleni bıyl talqylap, sheshimge kelý kerek.
«Ekinshisi – jeńildikter. Aýyldyq kvota men jetim balalarǵa beriletin kvota máselesi talqylanyp jatyr, biraq másele áli de sheshilmedi. «Altyn belgi» jaıly aıtatyn bolsaq. Bıyl granttar UBT-dan jınaǵan baldar boıynsha berildi. Keıinirek respýblıkalyq komısıa «Altyn belgi» ıegerleri aldynda mindetterin oryndaý úshin memlekettik granttarǵa shamamen taǵy 4 paıyz grant qosty. Bıyl biz osy júıege zańdy túrde ózgertýler engizýdi josparlap otyrmyz», – dedi Saǵadıev.
Sondaı-aq, mınıstr jetekshi oqý oryndarynda, ásirese, Astanadaǵy JOO-larda oryn jetispeýshiligin aıtyp ótti.
«Bul JOO-lardyń tanymaldyǵymen baılanysty, ıaǵnı, barlyǵy elordaǵa barǵysy keledi. Sáıkesinshe, joǵary bal jınaǵan balalar Eýrazıa ulttyq ýnıversıtetine nemese Astananyń medısıanalyq akademıasyna, tipti, aqyly bólimine túse almaıdy. Sebebi oryn joq. Bıyl bul másele taǵy da talqylanady. Bizdiń oıymyzsha, muny talqyǵa salyp, bir sheshimin tabý kerek», – dedi Erlan Saǵadıev.
