Qazaqstannyń týroperatorlary «Astana EKSPO-2017» UQ AQ basqarma tóraǵasy Ahmetjan Esimovten halyqaralyq kórmeni 1 qarashaǵa deıin sozýdy surady dep habarlaıdy Qamshy.kz aqparat agenttigi QazAqparatqa silteme jasap.

Ashyq hat avtorlarynyń aıtýynsha, týroperatorlar men týrbirlestikter úshin tuńǵysh ret týrızmnen paıda tabýǵa múmkindik týǵan.

«Az ýaqyttyń ishinde biz kóptegen jumys oryndaryn ashyp, úlken tabys taptyq. Stýdentter men atalǵan salanyń kóptegen mamandary sharalardy uıymdastyrýda jáne shet tilderin meńgerýde baǵa jetpes tájirıbe aldy. Jastardyń jumyspen qamtylýy artty. Kompanıalar 10-nan 200 adamǵa deıin jastardy jumysqa aldy. Otandyq týroperatorlar ózderiniń týrmarshrýttaryn is júzinde synnan ótkizip, týrıserdiń pikirlerin jınaqtady jáne óz ónimderin jetildirýge kiristi. Búgingi kúni osy múmkindiktiń «EKSPO-2017» kórmesi barysynda ǵana, ıaǵnı tek úsh aıǵa ǵana berilgeni másele bolyp tur. Qurmetti Ahmetjan Smaǵululy! Týrbirlestikterdiń atynan Qazaqstan Respýblıkasynyń Prezıdenti men kórmeniń Halyqaralyq búrosyna ótinish joldap, kórmeni 2017 jyldyń 1 qarashasyna deıin sozý múmkindigin qarastyrýdy suraımyz», – delingen úndeýhatta.

Oǵan qol qoıǵandardyń arasynda týroperatorlar, restoratorlar, qonaq úı bıznesiniń ókilderi bar. Ashyq hatqa jalpy 30 kompanıa qol qoıǵan.