16 jáne 17 tamyz kúnderi saǵat 19:00 M.Gorkıı atyndaǵy Memlekettik akademıalyq orys drama teatry sahnasynda osy jazdyń kópten kúttirgen spektakliniń tusaýkeseri ótedi dep habarlaıdy Qamshy.kz aqparat agenttigi Astana ákimdiginiń baspasóz qyzmetine silteme jasaı otyryp. 

Teatr akterleri kórermender nazaryna Aleksandr Sergeevıch Pýshkınniń ólmes shyǵarmasy – «Evgenıı Onegın» romanynyń sahnalanǵan nusqasyn usynady.

Elorda turǵyndary men qonaqtaryn jarqyn, este qalatyn, basqa eshbir qoıylymǵa uqsamaıtyn spektákl kútýde. Ony tamashalaǵan kórermender «Mádenıet ensıklopedıasyn» qaıta oqyp, orys ádebıetiniń altyn ǵasyryna úńile alady, – deıdi teatrdyń shyǵarmashylyq ujymy. 

Reseılik tanymal teatr rejıseri Iýrıı Kvátkovskıı kórermender úshin Pýshkın shyǵarmasyn jańa, kútpegen, oılamaǵan qyrynan ashady. Qoıýshy rejıser HHİ ǵasyr adamdaryna «Evgenıı Onegın» romanyn tereń túsindirý úshin sahnada jańa áreketter men aıla-tásilderdi qoldanady.

Spektákl Reseı Federasıasy teatr qaıratkerleri Odaǵymen birlese qolǵa alýda.