Búgin EHRO kórmesiniń aýmaǵynda Úndistan memleketiniń Ulttyq kúni ótip jatyr dep habarlaıdy Qamshy.kz aqparat agenttigi.

«Habar» agenttiginiń málimetine súıensek, eki eldiń memlekettik týlary kóterilip, ánurandary shyrqaldy. Sahna tórine elimizdiń Syrtqy ister mınıstriniń orynbasary Aqylbek Kamaldınov shyǵyp, quttyqtaý sózin sóıledi.

Úndistan tarapynan EHRO kórmesine el delegasıasyn basqaryp, Qazaqstandaǵy elshi Harsh Kýmar Djaın keldi. Keıin ulttyq sahnada úndi eliniń «Radjbahar» toby bı oryndady. Qazaqstanda Úndistan mádenıetine áýes jandar kóp bolǵandyqtan, mundaı kórinis kópshiliktiń kóńilinen shyǵady degen oıdamyz. Al keıin qalyptasyp qalǵan dástúr boıynsha delegasıalar men sharaǵa shaqyrylǵan qonaqtar ulttyq pavılonǵa baryp, jergilikti ekspozısıalarmen tanysady.

Úndistanda ǵylym salasy qarqyndy damyp keledi. Onyń ishinde balamaly energetıkaǵa basa nazar aýdarylyp otyr. Sebebi eldiń aýyldy aımaqtarynda turatyn halyqty elektr energıasymen qamtý aldyńǵy qatardaǵy máselelerdiń biri bolyp tur. Sol sebepti kezinde Úndistan bıligi halyqaralyq kún alánsyn qurýdy jón kórdi. Mundaǵy basty maqsat – álemdik energotıimdilik naryǵynda normatıvtik quqyqtyq bazany qurý. 2030 jylǵa deıin jergilikti úkimet balamaly energıa óndirisin 400 GVt-qa deıin jetkizýdi kózdep otyr. Jel energetıkasyn óndirýden de memleket álemde kósh bastap keledi. Osy jetistikter jaıly tolyq aqparat ulttyq pavılonda bar.