QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysynda QR bilim jáne ǵylym mınıstri Erlan Saǵadıev 2017-2018 jańa oqý jylynyń bastalýyna ázirlik barysy týraly esep berdi. Bul týraly Qamshy.kz aqparat agenttigi Premer-mınıstrdiń baspasóz qyzmetine silteme jasap habarlaıdy.
E.Saǵadıev negizgi tujyrymdamalyq sheshimderdiń ótken jyly qabyldanǵanyn aıtty. Sondyqtan bıylǵy jáne kelesi jyldyń mindetteri – bastalǵan sharalardy sońyna deıin aıaqtap, nátıjelerge qol jetkizý.
Bul baǵyttaǵy mindetterdiń biri – 2019 jyldyń qyrkúıek aıynda barlyq balabaqshalar men mektepterde nólinshi synypty engizýge ázirlik bolyp tabylady. Onyń qatarynda «Álippeni» tabysty maquldaý, tárbıeshiler men pedagogterdiń biliktiligin arttyrý, normatıvtik-quqyqtyq bazany 0+11 boıynsha 12 jyldyq oqytý sıkline sáıkestendirý bar.
Mekteptegi basty mindet – ótken jyly qolǵa alynǵan jańartylǵan mazmunǵa kóshý bolyp qala beredi. 2017 jyly oǵan qosymsha 2, 5 jáne 7 synyptar kóshedi.
Sonymen qatar pánderdi aǵylshyn tilinde oqytý boıynsha aýqymdy pılot bastalady, oǵan til kýrstaryn bitirgen nemese endi bitiretin 1500-den astam muǵalim atsalysady.
Budan ózge, mektepterdiń qamqorlyq keńesterin qurý men odan ári nyǵaıtý, olarǵa burynǵydan da kóbirek ókilettilikter berý jáne qamqorlyq keńesteriniń baqylaýymen mektepterdiń akademıalyq, basqarýshylyq, qarjylyq erkindikterin josparly túrde keńeıtý mańyzdy baǵyt bolyp tabylady. KjTB men «Barshaǵa arnalǵan tegin KjTB» jobasy boıynsha jumystar ári qaraı jalǵasýda.
Joǵary oqý oryndary boıynsha basty mindet kásibı qaýymdastyqqa, jumys berýshilerge «Atameken» UKP-men birlesip qazaqstandyq JOO-lardyń sapasy, zamanaýılyǵy men naryqqa qajettiligi turǵysynan olardyń bilim berý baǵdarlamalarynyń naqty tizilimin qurýǵa múmkindik beretin zańnyń qabyldanýy bolyp tabylady. Bul baǵyttaǵy jumystar bastaldy – UKP-men birlesip İT-mamandyqtar tizilimi taıaýda tanystyrylatyn bolady. Bul naryqtan sapasyz jáne eskirgen bilim baǵdarlamalaryn alyp tastaýǵa múmkindik beredi.
Oǵan qosa, JOO-lardyń akademıalyq derbestigin arttyrý men qoǵamdyq baqylaýdy kúsheıtý formasy retinde baqylaý keńesterin nyǵaıtý júrgizilip jatyr.
Sóz sońynda Bilim jáne ǵylym mınıstri jalpy bilim berý júıesi oqý jylynyń bastalýyna ázir ekenin atap ótti, barlyq máseleler boıynsha keńinen túsindirý jumystary júrgiziledi.
QR Premer-mınıstri Baqytjan Saǵyntaev ákimdikter men múddeli memlekettik organdarǵa barlyq baǵyttardaǵy jumystardyń atqarylýyn baqylaýǵa alýdy tapsyrdy.
