Elbasy Qazaq ulttyq agrarlyq ýnıversıtetiniń rektory Tilektes Espolovty qabyldady. Bul týraly Qamshy.kz aqparat agenttigi Aqordanyń baspasóz qyzmetine silteme berip habarlaıdy.

Kezdesý barysynda Qazaq ulttyq agrarlyq ýnıversıtetiniń rektory joǵary oqý ornynyń qyzmeti men damý perspektıvasy jóninde málimdedi.

– Biz búginde on bir halyqaralyq konsorsıýmǵa múshemiz. 2015 jyldan bastap QS EESA («Damýshy Eýropa jáne Ortalyq Azıa») tujyrymy boıynsha álemniń úzdik ýnıversıtetteriniń reıtıńine qatysyp, bul baǵalaý aıasynda alǵashqy jyly 150 joǵary oqý ornynyń ishinen 67-orynǵa ıe boldyq. Qazirgi ýaqytta ýnıversıtette 50-ge jýyq ǵylymı joba iske asyrylýda, – dedi T.Espolov.

Sonymen qatar, Memleket basshysyna otandyq agroónerkásiptik keshendi ınovasıalyq damytýǵa múmkindik beretin ýnıversıtettiń agrotehnologıalyq habynyń qyzmeti jóninde aıtyldy.

– Bul hab jańa tehnologıalardy, ıdeıalar men startap jobalardy izdestirýge, olardy tartýǵa jáne engizýge, sondaı-aq memleket-jekemenshik seriktestiginiń tetikterin iske asyryp, ýnıversıtettiń ózin-ózi qarjylandyrýyn jáne derbestigin qamtamasyz etýge arnalǵan, – dedi Qazaq ulttyq agrarlyq ýnıversıtetiniń rektory.

Qazaqstan Prezıdenti elimizdiń aýmaǵynda aýyl sharýashylyǵy salasyndaǵy ǵylymı ortalyq qurý qajet ekenin atap ótti.

– Ǵylymı zertteýlerdiń nátıjelerin engizý men mamandardy daıarlaýdyń tıimdiligin arttyrǵan jón. Sondaı-aq, agroónerkásiptik keshenniń básekege qabiletti, eksportqa baǵyttalǵan ónimderiniń kólemin arttyrý kerek, – dedi Nursultan Nazarbaev.