Áleýmettik jelide Oǵyz Doǵan esimdi túrkıalyq jýrnalısiń Eır-Astana ushaǵyndaǵy jolserikten qazaq tilinde qyzmet kórsetýdi suraǵan, alaıda oǵan jaýap retinde jolserik zań jazylǵan qaǵazdy usynyp, polısıa shaqyratynyn aıtqan vıdeo taralǵany habarlanǵan.

Bolǵan oqıǵaǵa baılanysty Oǵyz Doǵannyń óz aýzynan aıtqan vıdeosyn Aman Qazaq esimdi Feısbýk qoldanýshysy jarıalady dep habarlaıdy Qamshy.kz aqparat agenttigi.

«Astana-Almaty baǵytynda Eır-Astana ushaǵymen ushqanymda qazaq qyzy kelip, orys tilinde saırady. Men memlekettik tilde sóıleýin suraǵanymda, minezin kórsetti. Biraq men talap ettim», - deıdi túrkıalyq jýrnalıs.

Oǵyz Doǵannyń aıtýynsha, jolserik orys jáne aǵylshyn tilderinde ǵana qyzmet kórsetken. Al túrkıalyq azamat talap etken memlekettik tilde jolserik qyz túsindirmegen. Onyń ústine qyzdyń er adamdy keleke etip  turǵany baıqalady.

«Álgi orys qyz qujattarmen keldi, olarmen meniń betimdi jaýyp, telefonymdy ıterip, ózi birdeńelerdi orys tilinde aıtyp tur. Men qujattardy da túsinbedim. Qaǵazdaryn laqtyryp jibergenimde, «polısıa, polısıa» dep aıqaıǵa basty. Ushaqtan shyqsaq, Qazaqstannyń polısıasy kútip tur eken. «Ákimshilik erejelerdi buzdyńyz» degen aıyppen meni alyp ketti. Belgisiz sebeptermen polısıa bólimshesinde ustap otyrdy», - deıdi Oǵyz Doǵan.

Polısıa qyzmetkerleri 6800 teńge aıyppul salǵan túrkıalyq azamat Qazaqstan Respýblıkasynda memlekettik tilde, ata-babamyzdyń urpaqtan-urpaqqa qaldyrǵan ana tilinde sóıleýin talap etkeni úshin 1 teńge aıyppul salýdy da uıat sanaıdy. Onyń bar talap etetini, ushaqtaǵy jolserik qyzdy jaýapqa tartyp, jazalaý sharasyn qoldaný.

«Bul bir adamnyń ǵana emes, qazaq eliniń problemasy. Qazaq elinde qazaq tilin qurmetteýdi suraýǵa bárimizdiń qaqymyz bar. Men tek sony suraımyn», - dep qorytyndylady sózin túrik azamaty.