Qyzylordada jańa úlgidegi avtobýs parki ashyldy dep habarlaıdy Qamshy.kz aqparat agenttigi Qyzylorda oblysy ákimdiginiń baspasóz qyzmetine silteme jasap. Oǵan Qyzylorda oblysynyń ákimi Qyrymbek Kósherbaev qatysyp, qyzylordalyqtardy qýanyshtarymen quttyqtady.

Avtoparktiń ereksheligi – qala kóleminde qyzmet kórsetetin úlken syıymdylyqtaǵy avtobýstarǵa arnalǵan turaqtar, janarmaı beketi, kólik jýý alańy jáne avtobýstardyń úzdiksiz jumys jasaýyna jaǵdaı jasaıtyn túrli múmkindikter qarastyrylǵan.

"Qalamyzda halyqty baspanamen qamtý, ınjenerlik-ınfraqurylymdardy damytý sekildi eń mańyzdy salalarda maqtanyshpen aıtarlyqtaı aýqymdy jobalar júzege asyrylýda. Solardyń ishinde basty jetistikterimizdiń biri – qala turǵyndarynyń qoǵamdyq kólikke degen suranysyn qanaǵattandyrý jáne qalamyzdaǵy kólik qatynasyn damytý maqsatyndaǵy jobalar.  Mine, osyndaı mańyzdy jobalarymyzdyń taǵy bir nátıjesi – qoǵamdyq kólikterdi kútip-ustaýǵa, tehnıkalyq qyzmet kórsetýge jabdyqtalǵan qalalyq avtobýs parki paıdalanýǵa berilgeli tur", – dedi oblys ákimi Qyrymbek Kósherbaev.

Jańa avtobýstardyń tehnıkalyq jáne sanıtarlyq jaǵdaıy eldiń suranysyna saı bolýy úshin oblystyq búdjetten 2 mlrd. teńgeden astam qarjy qarastyrylǵan. Avtobýs parkiniń jalpy aýmaǵy 5 gektardy quraıdy jáne 200 avtobýsqa shaqtalǵan. Avtobýs parki 250-300 adamdy jumyspen qamtıtyn bolady.

Munymen qosa, aǵymdaǵy jyly janarmaı men qosalqy bólshekterdiń, gazdyń baǵalarynyń birshama qymbattaýyna baılanysty jolaqy tarıfteri qaıta qaraldy. Endigi kezekte orta syıymdylyqtaǵy 100-150 jańa avtobýstar satyp alynyp, bılettik júıe tolyqqandy engiziletin bolady. Sóıtip, oblys ortalyǵynda qoǵamdyq kólik qyzmeti tolyǵymen jańartylady.

Esterińizge sala keteıik, osydan 3 jyl buryn qala ishinde júretin qoǵamdyq kólik tasymalyn sapaly qyzmetpen qamtamasyz etý maqsatynda «Qyzylorda» avtobýs parki» qurylǵan bolatyn. Az ýaqyttyń ishinde «Qyzylorda» avtobýs parki» birshama jetistikterge qol jetkizip keledi. Mysaly, 2014 jyly Qyzylorda Avtobýs parkine búdjetten bólingen 500 mln. teńgege qala tynysyna jańa serpin bergen, ekologıalyq taza, eń bastysy múmkindigi shekteýli azamattarǵa qoljetimdi 20 avtobýs alynǵan bolatyn. Osy jobany jalǵastyrý maqsatynda «Baıqońyr» áleýmettik-kásipkerlik korporasıasy jáne «Eýropalyq qaıta qurý jáne damý» banki arasyndaǵy kelisimge sáıkes avtobýs parkine qosymsha 92 jańa avtobýs alyndy. Nátıjesinde, búgingi kúni qaladaǵy kishi syıymdylyqtaǵy qoǵamdyq kólikterdiń ornyna jańadan barlyq talaptarǵa sáıkes, jolaýshylarǵa yńǵaıly jaǵdaı jasalǵan úlken syıymdylyqtaǵy 112 avtobýs negizgi áleýmettik mańyzdy marshrýttar boıynsha qala halqyna qyzmet etýde. Sondaı-aq, avtobýstarǵa GPS qurylǵysy ornatylyp, ara qashyqtyqtyń saqtalýy qatań baqylanady. Jańa qoǵamdyq kólikterdiń barlyǵynda beınekamera ornatylǵan jáne josparǵa sáıkes bılettik júıe engizilýde. Sonymen qatar, qalaishilik jáne qalamańyna qatynaıtyn qoǵamdyq kólikterdiń qyzmetin sapaly uıymdastyrý maqsatynda Qorqyt ata kóshesi, Temir jol vokzaly men Salamatov kóshesi boıynda 3 dıspecherlik pýnkt salyndy.