Aǵymdaǵy jyly 28 tamyzda Aqmola oblysynda «EQUUS» derekti trılogıasynynyń túsirilimin bastaý josparlanyp otyr. Osyǵan oraı, QR Aqparat jáne komýnıkasıalar mınıstri Dáýren Abaev túsirilim alańyna arnaıy baryp qaıtty. Sondaı-aq, Aqparattyq týrǵa «Qazaqstan» RTRK AQ basqarma tóraǵasy Elan Qarın jáne buqaralyq aqparat quraldarynyń ókilderi qatysty, dep habarlaıdy Qamshy.kz aqparat agenttigi OKQ saıtyna silteme jasap.
Atalǵan týyndy arqyly Qazaqstan jeri órkenıettiń ortalyǵy bolǵanyn álemge tanytýǵa úlken múmkindik týyp otyr. Álem ǵalymdary jylqy eń alǵash qolǵa úıretilgen jer qazirgi Qazaqstan terıtorıasy ekeni týraly kóptegen dálelder keltirdi. Fılmniń Qazaqstan aýmaǵynda túsirilýiniń eń basty sebebi de – osy. Osy serıaldyń arqasynda jylqyny eń alǵash bizdiń ata-babalarymyzdyń qalaı úıretkenin kúlli álem tamashalaıtyn bolady. Bul Qazaqstannyń halyqaralyq arenadaǵy ımıjin arttyryp, tarıhy men mádenıetine qyzyǵýshyqty kúsheıtedi, – dedi Dáýren Áskerbekuly.
Aıta ketken jón, 2017 jyly 7 naýryzda ótken baspasóz maslıhatynda mınıstr Dáýren Abaev «Qazaqstan» RTRK» AQ–sy men «Clearwater Documentary Inc.» kompanıasynyń «EQUUS» derekti trılogıasyn túsiretinin jarıalaǵan bolatyn. Eki jaqtym memorandýmǵa sáıkes, «Qazaqstan» korporasıasy «Equus» fılmin Qazaqstan aýmaǵynda qazaq jáne orys tilderinde taratý quqyǵyna ıe bolady. Sondaı-aq, halyqaralyq aqparat taratýshy qyzmetin atqarady.
«EQUUS» trılogıasynda jylqy janýarynyń adamzat tarıhyndaǵy róli, sondaı-aq Ortalyq Azıa dalasyndaǵy jylqy sharýshylyǵynyń qashan jáne qalaı bastalǵany jaıynda baıandalatyn bolady. Barlyq materıaldar ǵylymı zertteýlerge negizdelgen. Trılogıanyń rejıseri – kanadalyq Naıobı Tompson. Prodúseri – qazaqstandyq Nurbol Baımuhanov. Túsirý jumystaryna sheteldiń kásibı kınematograftary, art-dızaınerleri men dybys rejıserleri tartylady. Budan bólek, tyń jobany iske asyrýǵa Qazaqstannyń kásibı mamandary – rekvızıtorlar, sýretshiler, kaskaderler men kınogerler atsalysady. Negizgi maqsat – kóshpeli halyqtyń ejelgi turmys saltyn qaz-qalpynda kórsetý. Ol úshin Kanada men Germanıanyń úzdik túsirý toptary keledi. Fılmde tanymal kompozıtor Darren Fangtyń sımfıonıalyq mýzykasy qoldanylady.
«EQUUS» trılogıasy «Adamzattyń Uly Odısseıi» fılmi sıaqty keńinen tanylady degen senim bar. Ony álemniń 50 elinde kórsetý josparlanǵan.
