Búgin úkimet úıinde QR Investısıalar jáne damý mınıstri Jeńis Qasymbektiń qatysýymen Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýynda bergen tapsyrmasyn oryndaýǵa baılanysty tehnologıalyq jańǵyrtý bólimi boıynsha baspasóz máslıhaty ótti dep habarlaıdy Qamshy.kz  aqparat agenttigi  QR Investısıalar jáne damý mınıstrliginiń baspasóz qyzmetine silteme jasaı otyryp.

Jeńis Qasymbektiń aıtýynsha, elimiz Indýstrıa 4.0 tehnologıasyna kóshý prosesi álem boıynsha áli bastapqy kezeńde keledi. Damyǵan jáne tez damýshy elderdiń basym kópshiligi ózderiniń ulttyq sıfrly transformasıa strategıalaryn tek sońǵy 3-4 jylda ǵana iske asyrýǵa kiristi (Germanıa 2011 jyly, AQSH – 2012, Japonıa, Qytaı, Eýro odaqtyń basqa da elderi – 2014-2015 jyldary qabyldady). Halyqaralyq sarapshylardyń aıtýynsha, Indýstrıa 4.0 aıasynda ázirge bári tolyq ózgerip ketedi degen túsinik joq. Ónerkásipterdiń jańa standartqa túbegeıli kóshýi aldaǵy 10-15 jylǵa boljanyp otyr.

«Bizde bul prosesten qalmaýdyń múmkindigi bar. Mundaǵy máseleniń barlyq qıyndyqtaryna qaramastan, biz Indýstrıa 4.0 tehnologıasy Qazaqstan úshin jańa múmkindikter ákeletinin kórip otyrmyz. Sonyń ishinde tıimdilikti arttyrý, jańa bıznes pen eksportqa baǵyttalǵan óndiris qurý máselelerin aıtýǵa bolady», – dep atap ótti QR Investısıalar jáne damý mınıstri.

Mınıstrlik jyl basynan beri tıisti sharalardy ázirleýde belsendi jumystar atqaryp keledi.

«Bıyl qyrkúıek aıynda halyqaralyq sarapshylarmen birge ónerkásipterdiń Indýstrıa 4.0 tehnologıasyna ótýge daıyndyǵynyń tehnıkalyq taldaýyn aıaqtaımyz. Al jyl sońyna qaraı 2025 jylǵa deıin Indýstrıa 4.0 elementterin engizý boıynsha Úkimet qaýlysyna sáıkes qadamdyq jospardy qabyldaımyz», – dedi Jeńis Qasymbek.

Sonymen qatar mınıstrlik ERG, KazZinc, ArcelorMittal, Qazaqmys jáne basqa da júıequraýshy iri kompanıalarmen jumys júrgizip keledi.

«Búgingi tańda atalmysh kásiporyndar ózderiniń sıfrly jańǵyrý josparlaryn daıyndap, «aqyldy kenish» sıaqty baǵdarlamalaryn iske asyrýǵa kirisip ketkenin atap ótken jón. Onda barlyq derekterdi taldaý,  aldyńǵy qatarly dachıkter men sensorlar, ıntegrasıalanǵan aqparattyq júıeler (ERP, MES), robottandyrý operasıalary sıaqty taǵy basqa da tehnologıalar engiziletin bolady. Mysaly, ERG kompanıasy aldaǵy 7-8 jylda shamamen 800 mlrd. teńgeniń sıfrlandyrý jobasyn ınvestısıalaýdy josparlap otyr», – dep málimdedi mınıstr.