Keler jyldan bastap Qazaqstan aqshyl munaı ónimderin eksportqa shyǵarýy múmkin. Bul týraly Energetıka mınıstri Qanat Bozymbaev Úkimettegi brıfıńte málimdedi.

Onyń aıtýynsha, otandyq munaı óńdeý zaýyttary iske qosylǵannan keıin, elimizdi otynnyń túr-túrimen qamtıdy. Al artylǵan ónim Orta Azıa men Aýǵanstan memleketterine eksporttalýy tıis. Kásiporyndardyń búdjetine túsken qarajat esebinen jańǵyrtýǵa alynǵan qaryzdar óteledi. Vedomstvo basshysy Shymkent zaýyty qazirdiń ózinde qara altyndy óńdeýge daıyn ekenin atap ótti. Al Atyraý men Pavlodardaǵy kásiporyndardyń jaramdylyǵy bıyl qarasha aıynda tekserýden ótedi. Bul týraly Qamshy.kz aqparat agenttigi QR Energetıka mınıstrliginiń baspasóz qyzmetine silteme jasap habarlaıdy.

Sonymen qatar mınıstr jańartylǵan nysandardyń Indýstrıa 4.0 baǵdarlamasynyń standarttaryna saı ekendigin alǵa tartyp, zaýyttaǵy jumys qorshaǵan ortaǵa esh zıan keltirmeıtinin jetkizdi.

QR Energetıka mınıstri Qanat Bozymbaevtyń aıtýynsha, Qazaqstan men Reseı Federasıasy arasynda aqshyl munaı ónimderine qatysty kelisim bar. Qujatqa sáıkes biz ony syrtqa shyǵara alamaımyz. Sebebi kórshiles el bizge benzın men dızeldik otyndy baj salyǵynsyz satyp otyr. Bizdiń munaı óńdeý zaýyttarymyz iske qosylǵannan keıin, bul kelisimdi qaıta qarastyramyz.

Sonymen qatar mınıstr elordaǵa Qyzylorda oblysynan gaz qubyryn tartý jobasy ázirlengenin aıtty. Onyń qýattylyǵy 3 mıllıard tekshemetrge teń. Joba quny - 260 mıllıard teńge. Ony júzege asyrý úshin jeke ınvestorlar tartý kózdelip otyr.