Baqytjan Saǵyntaev Memleket basshysy belgilegen mindetterdi iske asyrý aıasynda jaýapty memlekettik organdarǵa jáne ákimdikterge «Nurly Jol» memlekettik baǵdarlamasy boıynsha qarajattardy ıgerý máselesin turaqty baqylaýda ustaýdy tapsyrdy, dep habarlaıdy Qamshy.kz aqparat agenttigi Premer-mınıstrdiń baspasóz qyzmetine silteme jasap. Ásirese bilim berý nysandary turǵysyna erekshe kóńil bólý tapsyryldy. Osyǵan oraı, Ulttyq ekonomıka mınıstrligine aı saıyn nysandardyń ýaqytyly ótkizilýine monıtorıń júrgizip, Úkimetke aqparat berip otyrý tapsyryldy.
«Nurly jer» baǵdarlamasy boıynsha QR IDM-ge «Báıterek» holdıńimen jáne óńirlerdiń ákimderimen birlesip 1 qazanǵa deıin baǵdarlamaǵa ekinshi deńgeıli bankterdi belsendirek tartý men ony iske asyrýdyń tıimdiligin arttyrý úshin, baǵdarlama tetikterine túzetýlerdi qarastyratyn Úkimet sheshiminiń jobasyn engizý týraly tapsyrma berildi.
QR IDM-ge QR AKM-men birlesip baǵdarlama tetikterin aqparattyq súıemeldeý boıynsha medıa-jospardy bekitip, atalǵan jumysqa oblystardyń ákimderin tartý júkteldi.
Indýstrıaldy-ınnovasıalyq damý memlekettik baǵdarlamasy boıynsha sıfrlandyrý men jańa tehnologıalardy engizý esebinen baǵdarlama tıimdiligin arttyrý qajettigi baıqalǵan. Osyǵan oraı, QR IDM-ge ákimdiktermen jáne múddeli uıymdarmen básekege qabiletti eksporttyq óndiristerdi damytý boıynsha jumysty úılestirý tapsyryldy.
Sondaı-aq QR Premer-mınıstri óńirlerdiń ákimderine ındýstrıalandyrýdyń óńirlik kartalary aıasynda engizilgen, barlyq toqtap turǵan kásiporyndardy iske qosý boıynsha naqty jumystardy júrgizýdi jáne 1 jeltoqsanǵa deıin olardyń jumysyn qaıta jandandyrýdy tapsyrdy.
AÓK damytý boıynsha, QR Aýyl sharýashylyǵy mınıstrligine Qazaqstannyń qarjygerler qaýymdastyǵymen, «Atameken» UKP jáne oblystardyń ákimderimen birlesip bir aılyq merzimde iri agroholdıngterdiń qarjylyq saýyqtyrý jumystarynyń egjeı-tegjeıli taldaýyn jasap, Úkimetke tıisti usynystardy jiberý júkteldi.
Budan ózge, QR Premer-mınıstri ózara saqtandyrý qoǵamdarynyń qyzmetin retteý arqyly, 2018 jylǵy 1 qańtarǵa deıin ósimdik sharýashylyǵyndaǵy mindetti saqtandyrý máseleleri boıynsha zańnamaǵa ózgerister men tolyqtyrýlar ázirleýdi tapsyrdy.
Ónimdi jumyspen qamtý jáne jappaı kásipkerlikti damytý baǵdarlamasyn iske asyrý aıasynda eńbek, ulttyq ekonomıka, qarjy jáne aýyl sharýashylyǵy mınıstrlikterine óńirlerdiń ákimderimen birlesip, Úkimetke aımaqtyq kvotalardy ulǵaıtý, elimizdiń ońtústik óńirlerinen soltústikke erikti túrde kóshýge yntalandyrý jáne qajetti esepterdi daıyndaý boıynsha usynystardy Úkimetke jiberý tapsyryldy.
QR UEM men QR ASHM-ge ákimdermen birlesip, bir aı ishinde halyqty shaǵyn nesıelendirýmen qamtamasyz etý kólemin ulǵaıtý, sonyń ishinde «Bıznes – Bastaý» jobasy boıynsha qarjylandyrylǵan startaptardyń úlesin arttyrý týraly tapsyrmalar berildi. B. Saǵyntaev óńir ákimderine baǵdarlamany iske asyrý aıasynda azamattardy zeınetaqy júıesine jáne mindetti áleýmettik medısınalyq saqtandyrýǵa tartý úshin turaqty jumys oryndaryn ashýǵa erekshe kóńil bólý kerektigin aıtty.
Ulttyq eksporttyq strategıa turǵysynan QR IDM-ge tıisti memlekettik organdarmen birlesip, bir aılyq merzimde eksportshylarǵa qoldaý kórsetý máselesinde mınıstrlikterdiń, jergilikti atqarýshy organdardyń jáne Kazakh Export ulttyq kompanıasynyń jaýapkershilik aımaqtaryn bólý boıynsha naqty usynystar berý júkteldi.
Budan ózge, QR UEM-ge jaýapty memlekettik organdarmen jáne ÚEU-men bızneske «Azamattarǵa arnalǵan úkimet» korporasıasynyń qyzmeti tárizdi memlekettik qyzmetterdi kórsetý boıynsha usynystardy zerttep, usyný tapsyryldy.
Mádenıet jáne sport, bilim jáne ǵylym, aqparat jáne komýnıkasıalar, din isteri jáne azamattyq qoǵam, qarjy mınıstrlikterine, óńirlerdiń ákimdikterine «Rýhanı jańǵyrý» baǵdarlamasy aıasynda jobalardyń ýaqytyly iske asyrylýyn jeke baqylaýǵa alý tapsyryldy.
«Alǵa qoıylǵan mindetterdi múltiksiz oryndap, jumysymyzǵa tıisti túzetýler engizýimiz qajettigine basa nazar aýdarýǵa tıispiz», – dedi Baqytjan Saǵyntaev.
