Búgin EKSPO-2017 Halyqaralyq mamandandyrylǵan kórme aıasynda Saýd Arabıa Koróldiginiń Ulttyq kúni merekelendi dep habarlaıdy Qamshy.kz aqparat agenttigi. «Bolashaq energıasy» - Kórme taqyryby el Úkimetiniń 2040 jylǵa qaraı elektr energıasyn óndirý úshin qazba otynyn qoldanýdan bas tartý týraly ustanymyn kórsetedi. Abdalla ıbn Abdýl-Ázız Al Saýd atyndaǵy jańartylatyn jáne atomdyq energıa ǵylymı qalashyǵynyń prezıdenti doktor Hashim Iamanı álem elderi bolashaq úshin energıany saqtaý, jańa tehnologıalardy paıdalaný jáne olardy tıimdi qoldaný ádisterin engizý boıynsha birlesip jumys atqarý qajettigin atap ótti.
«Qazaqstandy EKSPO-2017 kórmesiniń sátti uıymdastyrýymen jáne is-sharanyń negizgi maqsattaryna qol jetkizýimen quttyqtaımyn. Eki el arasynda ornaǵan baýyrmaldyq qarym-qatynas ózara tıimdi ekonomıkalyq, mádenı yntymaqtastyqtyń damýyna negiz boldy. EKSPO-2017 kórmesine qatysýymyz - bolashaqqa senimmen qaraıtyndyǵymyzdy kórsetedi. Saýd Arabıa Koróldigi tabıǵı resýrstarǵa baı, ınvestısıalyq áleýeti zor jáne geografıalyq ornalasýy qolaıly memleket bolyp tabylady. Álemdik energetıka salasyndaǵy jetekshi ornyndy saqtaý úshin Saýd Arabıa Koróldigi balamaly energıanyń ekologıalyq taza jáne qaýipsiz óndirisin qamtamasyz etetin naqty qadamdardy júzege asyrýda. Sondaı-aq, jańartylatyn energıa kózderi salasynda ınovasıalardy qoldanýdy kózdeıdi. Elimizdiń pavılony atalǵan baǵytty damytatyndyǵymyzdy kórsetedi», - dedi doktor Hashim Iamanı.
Óz kezeginde Qazaqstan Respýblıkasy aýyl sharýashylyǵy vıse-mınıstri Rústem Qurmanov Saýd Arabıa Koróldiginiń Ulttyq pavılonynda usynylǵan tehnologıalar kórmeniń sátti ótýine óz úlesin qosatyndyǵyn atap ótti.
«Saýd Arabıa Koróldiginiń Islam álemindegi ekonomıkalyq múmkindikteri men geosaıası ornalasýynyń mańyzy zor. Qazaqstan táýelsizdikke qol jetkizgennen bastap eki el arasyndaǵy qarym-qatynastyń, sonyń ishinde energetıka salasyndaǵy damýdyń áleýeti zor dep sanaımyz. Búgingi is-shara Qazaqstan Respýblıkasy men Saýd Arabıa Koróldigi arasyndaǵy ózara tıimdi yntymaqtastyqty damytý jolynda jańa serpin beretindigine kámil senemin»,- dep qorytyndylady QR aýyl sharýashylyǵy vıse-mınıstri.
Saýd Arabıa Koróldiginiń Ulttyq pavılony memlekettiń álemdegi energetıkalyq balanystyń sapaly jáne qaýipsiz túrlendirýi boıynsha múmkindikterin kórsetedi. Pavılonnyń basty taqyryby «Turaqty energıa Koróldigi, bolashaqtaǵy ózgeris». Ondaǵy ekspozısıalar kórmege kelýshilerdi memlekettiń mádenıeti, salt-dástúri jáne tarıhymen tanystyrady.
