Bıyl eldegi jańa saıası naýqan qońyr kúzdi kútpeı-aq bastalyp ketti. Kúni keshe premer-mınıstrdiń jańa eki orynbasary taǵaıyndaldy. Úkimet quramyndaǵy Mádenıet jáne sport, Bilim jáne ǵylym, Densaýlyq saqtaý, Áleýmettik damý mınıstrlikteriniń jumysyna jaýapty vıse-premerlik laýazymnyń áli qalpyna keltirilmegenin (aqpan aıynda osy laýazymdy atqarǵan Imanǵalı Tasmaǵambetov Reseıge elshi bop ketip, ornyna eshkim taǵaıyndalmaǵan bolatyn – red.) eskersek, mınıstrler kabıneti aldaǵy ýaqytta qurylymdyq ta ózgeristerge ushyraýy múmkin.

Premer-mınıstr Baqytjan Saǵyntaevtyń Úkimet tizginin ustaǵanyna 9 qyrkúıekte bir jyl tolady. Bul mundaı laýazym úshin asa kóp ýaqyt emes. Buǵan deıingi premerlerdiń ishinde eń az otyrdy degen I.Tasmaǵambetovtiń ózi atalǵan laýazymdy bir jarym jyldaı atqarǵan edi. Saǵyntaevtyń jumysyna áli prezıdent tarapynan aıtarlyqtaı syn aıtylmady. Keıbir aldyńǵy áriptesterindeı aqparat quraldarynda da ashyq shabýylǵa ushyraǵan joq. Degenmen, bizdiń saıasatta bári de bola beredi. Máselen, Imanǵalı Tasmaǵambetov Reseıge elshi bop ketedi degen de eshkimniń oıynda joq edi. Sol sıaqty jaqyn kúnderi Prezıdent Úkimet basshysyn aýystyryp jatsa, tań qalyp kerek emes.

Eger bola qalsa, ol aýys-túıis Baqytjan Ábdirulynyń biliksizdiginen, ne Qazaqstan Úkimetiniń ózine júktelgen mindetterdi atqara almaýynan bolmaıdy. Onyń ústine premer aýysqanmen, mınıstrler quramy qatty ózgeriske ushyramaıtyny buǵan deıingi aýys-túıisterden belgili. Jyl basynda jarıalanǵan saıası jańǵyrý de-úre Úkimetke birshama derbestik berdi. Memlekettik baǵdarlamalardy qabyldaý men júzege asyrý jaýapkershiligi tolyqtaı mınıstrler kabınetiniń moınyna júkteledi. Odan bólek aldaǵy bılik tranzıti qarsańynda saıası elıtany taǵy da bir elekten ótkizip, eski gvardıanyń eleýli tulǵalaryna bılik baspaldaqtaryn myqtap bólip berý kerek. Osy turǵydan alǵanda eldegi sanaýly konstıtýsıalyq laýazymdardyń biri uzaq jylǵy synaqtardan súrinbeı ótken, memlekettik apparat pen qarjy-óndiristik toptar arasynda salmaqty tulǵaǵa tabystalýy qajet.

Bul orynǵa Ahmetjan Esimovtiń kandıdatýrasyn nege aıtyp otyrmyz? Qazirgi tańda «Astana EKSPO-2017» Ulttyq kompanıasyn basqaryp otyrǵan ol jaqyn kúnderi halyqaralyq kórme jumysyn qorytyndylap, óz mısıasyn atqaryp bolady. Kórme pavılondarynyń qurylysy kezindegi birdi-ekili oqıǵalar bolmasa, jalpy EKSPO yń-shyńsyz ótti. Keledi degen qonaqtardyń sany artyǵymen bolmasa da oryndaldy. Kórmeni uıymdastyrý men ótkizý kezinde birshama qarjy únemdelgeni týraly da aıtylyp qalyp júr. Bunyń barlyǵy Esimovti tıimdi menedjer, sheber uıymdastyrýshy, salmaqty saıasatker etip kórsetetin jaǵdaılar. Elbasynyń ózi aıtqandaı, Ahmetjan Esimov basqa da memlekettik qaıratkerlermen birge búgingi Qazaqstannyń negizin qalaǵan azamat. Olaı bolsa, syndarly sátte Úkimet tizginin nege ustatpasqa?!

Bul – boljam, árıne. Biraq, biraz taqyrypqa tuzdyq bolarlyqtaı boljam. Bılik basyndaǵy ózgerister bir premer laýazymymen shekteledi deýden jáne aýlaqpyz. Úlken ózgerister men ótpeli kezeńde eldegi turaqtylyq pen elıtanyń ymyra-birligin saqtap, barlyq taraptardyń múddesi eskerilýi úshin Parlament palatalarynyń jetekshileri, memlekettik hatshy, Bas prokýror men Joǵarǵy sot tóraǵasy laýazymdary da qaıta bóliske túsýi ǵajap emes.

Jeńis SABYRJANULY