Aqparat jáne Komýnıkasıa mınıstri Dáýren Abaev Almaty qalasynda jáne Almaty oblysynda telejobalardyń túsirilimimen tanysty, dep jazady Qamshy.kz tilshisi. 29-30 tamyz kúnderi ótken sharaǵa mınıstrmen birge baspasóz týry uıymdastyryldy.

«Qozy Kórpesh – Baıan Sulý»  

Aldymen Mınıstr «Qazaqstan» RTRK basshysy Erlan Qarınmen birge Baıan Maqsatqyzynyń prodúserlik ortalyǵynda bolyp, «Qozy Kórpesh – Baıan Sulý» televızıalyq telehıkaıasynyń daıyndyq jumysymen tanysty.

Telehıkaıada qazaqtyń baıyrǵy ǵuryp, dástúrleri kórsetilgen, sondaı-aq, sol zamanǵy baqsy saryny, bádik, toıbastar, syńsý, jar-jar, aıtys, qoshtasý, estirtý, kóńil aıtý, joqtaý sıaqty ulttyq mýzykalyq saryn molynan paıdalanylǵan. Túsirilim jumysy aıaqtaǵan «Qozy Kórpesh – Baıan Sulý» televızıalyq telehıkaıasy Asy jaılaýynda, Almaty taýynda 2 aıǵa jýyq ýaqyt túsirilipti.

42 mınýttyq 6 bólim bolatyn Televızıalyq telehıkaıanyń bas prodúseri Baıan Maqsatqyzy. Senarıin Annas Baǵdat jazǵan. Basty rólderde Gúlzada Turlash, Erjan Muqataev, Baqtıar Qoja, Jaqsybek Qurmanbekov, Marat Abaı-Dildalar oınaǵan. Telehıkaıa ulttyq arnanyń jańa maýsymynda kórermenge jol tartatyn bolady.

«24 saǵat tabıǵat qushaǵynda»

Osydan soń Mınıstr Abaev pen Qarın jáne QazGeo Tóralqa Tóraǵasy Tólegen Tastanbekov «24 saǵat tabıǵat qushaǵynda» ekshn-realıtı shoýy jobasynyń stýdıasyna bardy. Elimizdiń 14 oblysyndaǵy qorshaǵan ortanyń tylsym qupıalaryn kórsetetin ekshn shoý «Qazaqstan» ulttyq arnasy men «Qazaq geografıalyq qoǵamynyń» ortaq jobasy.

Jobaǵa júrgizýshi bolǵa qatysqan 4000-nan astam úmitkerdiń arasynan akter, soǵys sahnalarynda ról somdap júrgen Nurjan Sadybekov tańdalǵan. Baǵdarlama sharty boıynsha júrgizýshimen birge baǵdarlama qonaǵy komýnıkasıasyz 24 saǵatyn jabaıy tabıǵatta ótkizýi kerek.

«Qazaqstan» RTRK basshysy Erlan Tynymbaıuly atalǵan jobalardyń Elbasynyń «Rýhanı jańǵyrý» maqalasynda aıtylǵan pragmatızmmen qabysatynyn aıta kelip, Aqparat jáne Komýnıkasıa mınıstri Dáýren Áskerbekulyn «24 saǵat tabıǵat qushaǵynda» ekshn-realıtı shoýynyń qatysýshysy bolýǵa shaqyrdy. Óz kezeginde mınıstr atalǵan baǵdarlamaǵa qatysýǵa mindetti túrde ýaqyt tabatynyn aıtyp, jýrnalıserdiń aldynda ýáde berdi.

«Qazaq batyrlary»

30 tamyz kúni Mınıstr Abaev «Qazaq batyrlary» tarıhı telehıkaıasynyń túsirilim jumystarymen tanysýǵa Almaty oblysynyń Raıymbek aýdanyna bardy. «Habar» agenttiginiń tapsyrysymen túsirilip jatqan kartınada qazaq batyrlarynyń ómiri men erlikteri sýretteledi.

«Bıyl túrli taqyryp pen janrda eń aýqymdy aýdıtorıaǵa baǵyttalǵan 39 telehıkaıa túsirý josparlanǵan. Atalǵan telehıkaıa Qarasaı batyr týraly. Ol shaıqastardyń birinde Soltústik Qazaqstanda qaıtys boldy. Dalanyń bir shetinde týyp, eldi-jerdi qorǵaý úshin at ústinde júrip týǵan jerinen jyraqta jerlendi. Qazaq elin qorǵap, bizge amanattaý úshin batyr babalarymyz ońaı qurbandyq bergen joq», - dedi Aqparat jáne Komýnıkasıa mınıstri Dáýren Áskerbekuly.

Qarasaı batyr men Aǵyntaı batyrdyń dostyǵy pash etiletin tele týyndynyń qoıýshy rejıseri Asqar Uzabaev. Tarıhı fılmdi alǵash ret túsirip jatqanyn aıtqan rejıser telehıkaıadan tolyq metrajdy fılm jasaǵysy keletinin jetkizdi.

«Qazaq batyrlary» tarıhı kórkem telehıkaıasy bıyl jeltoqsan aıynda kórermenmen qaýyshady. «Habar» arnasynda drama, komedıa, detektıv jáne otbasylyq týyndylardan telejobalar efırge daıyndalyp jatyr.

«Túsirilim jumystary bastalǵanǵa deıin kóptegen zertteý jumystary júrgizilip, tyńǵylyqty daıyndyq jasaldy. Kórermender bul telehıkaıa arqyly ókenimizge oralyp, el tarıhynda batyrlardyń qanshalyqty mańyzdy ról atqarǵandyǵyn kóredi», - deıdi «Habar» agenttigi Basqarmasynyń tóraıymy Almagúl Ahmetjanova.

Móldir Mekenbaı — Kartınada Qarasaı batyrdyń jary Bıbigúldiń rólin somdaıdy. Baı otbasynan shyqqan qyzdyń Qarasaı batyrǵa mahabbatyn somdaý úshin Móldir qazaqtyń tarıhı fılmderin, qazaq batyrlary týraly kóptegen kitaptardy qarap, atqa minýdi úırengen.

Móldir óner álemimen ǵana shektelmegen. Ol Nazarbaev ýnıversıtetiniń «Computer Science» mamandyǵy boıynsha 2 kýrs stýdenti. Jáýtikov atyndaǵy respýb-lıkalyq fızıka-matematıka mektebin altyn belgimen bitirgen ol tipti eresekter arasyndaǵy jıý-jıtsýdan 2016 jylǵy álem chempıony.

Aıta ketsek, mınıstr Abaev 2 apta ýaqyt buryn Aqmola oblysynda «EQUUS» derekti trılogıasynynyń túsirilim alańyna da arnaıy barǵan edi.