Sankt-Peterbýrgte bala VICH ınfeksıasynan kóz jumdy. "SPID-Ortalyǵynyń" habarlaýynsha, dindar ata-anasy balaǵa antıretrovırýstyq terapıa júrgizýge ruqsat etpeı qoıǵan. Bul aqparatty Reseı Densaýlyq saqtaý mınıstrliginiń VICH ınfeksıasy jónindegi mamany, profesor Evgenıı Voronın rastady, dep habarlaıdy Qamshy.kz aqparat agenttigi Sentralasian.org saıtyna silteme jasaı otyryp.
"Doktor Pıter" basylymynyń málimeti boıynsha, 2015 jyly sot ata-anaǵa balanyń emin qamtamasyz etýdi mindettegen. Biraq olar sot sheshimin oryndamaǵan, olar úshin shirkeýdiń aıtqanymen júrgen durys kóringen. Belsendiler eki márte prokýratýraǵa jáne balalar ombýdsmeninen aryzdanǵan, biraq jaǵdaı ózgermegen. Bala 29 tamyzda kóz jumdy.
"SPID-Ortalyq" deregi boıynsha, Orys pravoslav shirkeýiniń VICH/SPIDke qarsy kúresi terapıaǵa tyıym salmaıdy. Densaýlyq saqtaý mınıstrliginiń málimeti boıynsha, VICH ınfeksıasyna 860 myńnan astam reseılik shaldyqqan. SPID-pen kúres ortalyǵynyń baǵalaýy boıynsha, bul dertke shaldyqqandardyń shyn mánindegi kórsetkishi shamamen 1,5 mıllıonǵa jetedi.
Pikir qaldyrý