Astanadaǵy Beıbitshilik pen kelisim saraıynda Qazaqstandaǵy Vatıkan elshiliginiń uıymdastyrýymen «Barlyǵymyz birge ortaq úıimizdi aıalaıyq» atty Halyqaralyq dinaralyq forýmy ótti dep habarlaıdy Qamshy.kz aqparat agenttigi. Shara «EXPO-2017» halyqaralyq kórmesi sheńberinde ótkizilýde.

Forým jumysyna adamdy jan-jaqty damytýǵa járdemdesý boıynsha Vatıkannyń Dıkasterıa Prefekti (mınıstrlik), asa mártebeli Kardınal, «EKSPO-2017» kórmesindegi Vatıkan eli pavılonynyń komısary Pıter Kodvo Appıa Tarkson jáne memlekettik organdardyń basshylary men dinı uıymdardyń kóshbasshylary  qatysty.

Shara barysynda sóz sóılegen Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev Vatıkan elimizge dinı tatýlyqty jáne konfesıaaralyq kelisimdi nyǵaıtýda mańyzdy áriptes jáne qazaq halqynyń ómirinde mádenıet pen dinı qoǵamnyń damýynda aıryqsha orynǵa ıe bolyp  otyrǵandyǵyn atap kórsetti. Sondaı-aq, Nurlan Ermekbaev barsha qaýymdy alda kele jatqan Qurban Aıt merekesimen quttyqtady.

«Osy sátti paıdalanyp, Qazaqstan men Qasıetti Taq eli arasynda senimdilik pen ashyqtyqqa negizdelgen senimdi áriptestik ornatylǵanyn atap ótkim keledi. Qazirgi ýaqyttaǵy Memleket basshylary arasynda Nursultan Nazarbaev pen Rım papasy Fransısktiń dostyq qarym-qatynasy eki el arasyndaǵy áriptestikti odan ári nyǵaıta túsedi», – dep atap ótti mınıstr N.Ermekbaev.

Sońǵy jyldary túrli din ókilderi kezdesýlerinde ortaq úıimizdi atap aıtqanda jer sharyndaǵy klımatty, sý resýrstaryn, ormandardy qorǵaýdyń negizgi jáne ózge de aspektileri jóninde pikir almasyp júr. Forým barysynda qatysýshylar din men rýhanıattyń bizdiń planetamyzǵa jáne tabıǵat resýrstaryna barynsha nazar aýdartýǵa serpin beretindigin, sondaı-aq, jalpy adamzattyń ıgiligi jolynda jasalatyn isterge úlken demeýshi kúsh bolatyndyǵyn aıtty.    

Forýmǵa qatysýshylar osyndaı sharalardyń ótkizilýi tatýlyq pen kelisimdi nyǵaıtýǵa aıtarlyqtaı úles qosatynyn atap kórsetti.