Qazaqstan Respýblıkasynyń Memlekettik hatshysy Gúlshara Ábdiqalyqova «EKSPO-2017» kórmesiniń resmı is-sharalary aıasynda ótip jatqan Dúnıejúzilik kardıovaskýlárlyq jáne torakaldyq hırýrgter qaýymdastyǵynyń 27-shi kongresine qatysty, dep habarlaıdy Qamshy.kz aqparat agenttigi Aqordaǵa silteme jasap.

Kongreske Densaýlyq saqtaý mınıstri E.Birtanov, kórnekti álemdik deńgeıdegi jáne qazaqstandyq kardıohırýrgter men ǵalymdar, densaýlyq saqtaý salasynyń uıymdastyrýshylary, otandyq jáne sheteldik sarapshylar, medısına qyzmetkerleri qatysty.

Memlekettik hatshy kongrestiń ashylý rásiminde Qazaqstan Prezıdentiniń forýmǵa qatysýshylarǵa arnaǵan quttyqtaýyn oqyp berdi. Onda halyq densaýlyǵy men densaýlyq saqtaý salasyn damytý memleketimizdiń basym baǵyttarynyń biri ekeni atap ótilgen. Qazaqstan – búkil halyq joǵary mamandandyrylǵan tegin medısınalyq kómekke qol jetkize alatyn álemdegi az ǵana memlekettiń biri. Ulttyq ǵylymı kardıohırýrgıa ortalyǵynda kardıohırýrgıalyq operasıanyń barlyq túri jasalady. Ol elimizdiń ǵana emes, álemdik kardıohırýrgıanyń kóshbasshysynyń birine aınaldy. Adamzattyń densaýlyǵyn jaqsartý jolynda óz bilimi men kásibıligin iske asyrýǵa daıyn jetekshi mamandardyń basyn qosqan jahandyq forým – sonyń aıqyn dáleli.

Búginde «Densaýlyq» baǵdarlamasynyń arqasynda Qazaqstannyń kardıohırýrgıalyq qyzmeti qarqyndy damyp keledi. Eger 90-shy jyldardyń basynda elde júrekke jasalatyn ashyq operasıa sany jylyna 500-den artpasa, 2016 jyly 12 myńnan asyp tústi. Qazaqstan kardıohırýrgıanyń damý deńgeıi jóninen ozyq 30 eldiń tizimine kiredi.

2010 jyly qurylǵan Ulttyq ǵylymı kardıohırýrgıa ortalyǵy otandyq kardıohırýrgıanyń kóshbasshysy bolyp sanalady. Búginge júrek-qan tamyrlary aýrýlaryn dıagnostıkalaýǵa jáne emdeýge arnalǵan 18 ınovasıalyq tehnologıa engizildi, álemniń tek 20 elinde ǵana júrgiziletin 2050 biregeı ota jasaldy. Ortalyq júrek almastyrýǵa arnalǵan 55 operasıany tabysty iske asyrdy.