Bul taqyryp jaıly quddy tıegi salýly, ishek-pernesi taǵýly, qulaǵy keltirilip qoıylǵan dombyradaı tek shertseń bolǵany – saıraı jónelgiń keledi. Osy ýaqytqa deıin qanshama aqyn jyryna jamaý qylyp, qanshama jazýshy áńgimesine arqaý qylsa da, oqyrmandy jalyqtyrǵan emes.
Nege? Sebebi osynaý taqyryp, ár adamnyń qysqa ǵana ǵumyrynda sanaǵa saqtalyp, esten ketpes estelikterimen eskeriletin keremet kezeńderdiń biri...
Stýdenttik ómir. Árkimniń tolǵanysy ártúrli. Al men belgili aqyn Qadyr Myrza Áliniń óleńin negizge ala otyryp, óz tolǵanysymdy tarqatqym keledi.
«Almatymyz jastyqtyń baǵy ispettes,
Qanshama gúl sol baqqa qonys tepti» – degen óleń joldarynyń maǵynasyna búginde tereń boılaǵandaımyz. Ata-anamyzdyń janynan alǵash ret uzap, aıadaı ǵana aýyldyń úmitin arqalap arman qala Almatyǵa biz de keldik.
«Bastalmaǵan qalanyń dastany áli
Birinshi jyl dala dep jas tamady» – dep aqyn aǵamyz stýdenttik ómirdiń qyzyqqa toly alǵashqy kúnderin ádemi úılesimmen jyrǵa qosqan. Oqý jylynyń basyndaǵy bir-birimizdi tanymaı, árkim «ózinshe» bir «álem» bolyp júrgen kezdermen, endi biri kabınet taba almaı adasqan kúnder de óte shyqty. Ýnıversıtetke kelisimen «pervash» degen ataýdy arqalap aldyq.
Joǵarydaǵy jyr joldarynda aıtylǵandaı, ár kúnimiz jylaýmen ótti. «Osy qalaǵa beker keldik», «Óz qalamyzdaǵy oqýǵa tapsyrýymyz kerek edi» degen «aram» oılarymyzdyń da bolǵany jasyryn emes. Árıne, ondaı oılar kóńil-kúıimiz qulazyp, asqazanymyz «áńgime» aıtqan kezde sap ete qalatyn. Keıinnen «...Bıge barsa baratyn bir top bolyp,
Jalǵyz júrý degendi bilmeıtuǵyn» – degenniń keıpin kıdik. Aramyzdaǵy jandardyń biri «Qalaǵa shyǵyp, qydyryp kelmedik pe?» – dese, óre túrgelemiz. Qansha jerden keshigip bara jatyrǵanymyzben, taksı degenge minbeıtin edik.. Óıtkeni taksı baǵasy ájeptáýir qaltamyzdy qaǵatyn. Al taksıden jyryp alyp qalǵan 100 teńgemiz bir rollton alatyn aqshamyz.
Al oqýdyń kezindegi emtıhannyń orny bir bólek.
«On aı boıy masaırap oınaǵandar
Emtıhanda otyz kún kóz ilmegen» – degen jyr joldary beker aıtylmasa kerek-ti. Erteń emtıhan degen kúni, al kelip daıyndal, kúnimen kúlki joq, odan qalsa, uıqy joq. Ondaı kezde tań da erte atatyndaı bolyp kórinetin. Bar daıyndalǵanymyzben baryp, partaǵa jabysyp otyramyz. Biri úshin oqyǵany keledi, endi biri úshin «oqymaǵany» keledi. Muǵalimder de al kelip «99», «74», «84» sekildi ish kúıdirer baldy qoıady. Sodan soń júrgeniń: «Bir bal qosyp berińizshi», «Stıpendıamdy saqtap qalýym kerek», «Povyshkaǵa iligeıin degen edim», «4-ke bir bal jetpeı tur». Al osy kezde eriksiz mekteptegi muǵalimderińdi saǵynasyń.
«Bir jigittiń oıynda on armannan,
On jigitke jalǵyz-aq konspekti». Mektep qabyrǵasynda muǵalimdi qaqsatyp, júz aıtpasa úlgermeıtin biz – stýdent atanǵaly qolymyzdyń qalaı júrip ketkenin ańǵarmaı da qaldyq.
Mektep kezindegi «Qazaqstan Respýblıkasynyń Prezıdenti Nursultan Ábishuly», konspekt kezinde «QR Prez N.Nazarbaev» boldy da qaldy.
Shynymdy aıtsam, bıyl ǵana stýdenttik ómir – eń qyzyqty sátter degenge tolyǵymen kózim jetti. Ásirese 1-shi kýrstyń orny erekshe.
Stýdent sóziniń maǵynasy «izdenýshi» ekenin biletin shyǵarmyz. Kózdi ashyp-jumǵansha óte shyǵatyn tórt jylda izdenýshi ekenimizdi esimizde saqtap, altyn ýaqyttyń baǵasyn bileıik.
- Kýrator – «Men senderge jaman bolsyn demeımin...»
- Jataqhana – Ashtyqpen ótken talaı kúnderdiń kýási.
- Shákirt aqy – «Bylaı tartsam arba synady, bylaı tartsam ógiz óledi»
- Leksıa – «Sen tımeseń, men tıme».
- Starosta – Dekanat pen ustazdar arasyndaǵy «baılanys symy».
- Sesıa – «Myń ólip, myń tirilý»
- Rýbejka – Sesıanyń inisi.
- Dekanat – «Aıshylyq alys jerlerden, jyldam habar alǵyzdy».
- Býhgalterıa – Kvıtansıanyń jaýy.
- Kitaphana – «Adam bolatyn bala alysqa qaraıdy».
- Stýdenttik bılet – Jeńildikter janyńda.
- Semınar – «Ǵasyrdan da uzaq kún...»
- Retake – «Jazǵa qalyp asyqpaı oqımyz».
- «İshki grant» - 3.0-den túspeıtin GPA.
- Memlekettik grant - Stıpendıa saqtalsa boldy...
- Bankomat – Bitpeıtin kezek.
- Propýsk – «Tekseris beketi».
- Rolton – Ash qarynnyń «aýyz bastyryǵy».
- Oqyrman bıleti – «Bılet joq bolsa, kitap joq».
Nargıza Eres
Pikir qaldyrý