Nursultan Nazarbaev Amerıka Qurama Shtattarynyń Prezıdenti Donald Tramppen telefon arqyly sóılesti dep habarlaıdy Qamshy.kz aqparat agenttigi Aqordaǵa silteme jasaı otyryp.

Áńgimelesý barysynda Donald Tramp Qazaqstan Prezıdentin Astanadaǵy «EKSPO-2017» halyqaralyq kórmesiniń tabysty ótýimen quttyqtap, Amerıka delegasıasynyń osy is-sharaǵa qatysýynyń nátıjelerin joǵary baǵalady.

Memleket basshysy Nursultan Nazarbaev Tehas shtatyndaǵy ondaǵan adamnyń ómirin qıǵan tabıǵat apatyna baılanysty kóńil aıtyp, zardap shekken aýdandardaǵy ınfraqurylymnyń tezirek qalpyna kelýine jáne jergilikti halyqtyń qalypty tirshilikke qaıta oralýyna tilektestigin bildirdi.

Eki el kóshbasshylary bıylǵy 21 mamyrda Er-Rıadta ótken «Islam álemi – AQSH» samıti aıasyndaǵy alǵashqy kezdesýdiń Astana men Vashıngton arasyndaǵy yntymaqtastyqty nyǵaıtý isindegi mańyzdylyǵyn atap ótti.

Nursultan Nazarbaev AQSH Prezıdentine bıylǵy 10-11 qyrkúıekte Astanada Islam yntymaqtastyǵy uıymynyń ǵylym jáne tehnologıalar jónindegi samıti ótetinin aıtty.

Memleketter basshylary Qazaqstan men Amerıka qarym-qatynasynyń jaǵdaıyn jáne onyń damý perspektıvalaryn talqylady. Bul rette taraptar ekijaqty saýda-ekonomıka salasyndaǵy ózara is-qımyldy nyǵaıtý týraly ýaǵdalasty.

Prezıdentter óńirlik jáne halyqaralyq kún tártibindegi ózekti máseleler jóninde pikir almasty.

Nursultan Nazarbaev Qazaqstanda bıylǵy 29 tamyzda jumysyn bastaǵan Tómen baıytylǵan ýran bankiniń jahandyq qaýipsizdikti nyǵaıtýdaǵy mańyzdylyǵyna nazar aýdardy. 

Eki el kóshbasshylary Amerıka-Reseı qarym-qatynastarynyń jaǵdaıyna jeke toqtaldy. Qazaqstan Prezıdenti Vashıngton men Máskeý arasyndaǵy dıalogtyń jaqsaratynyna senim bildirdi.     

Donald Tramp Nursultan Nazarbaevty Vashıngtonǵa resmı saparmen kelýge shaqyrdy.

Memleketter basshylary áńgime sońynda eki jaqtyń da múddeli bolatyn máseleleri jónindegi turaqty dıalogty qoldaýǵa nıetti ekendikterin bildirdi. 

Telefon arqyly sóılesýge AQSH jaǵy bastamashy boldy.