"Týǵan jer" baǵdarlamasy aıasynda Eńbekshiqazaq aýdanyna qarasty Ashybulaq aýylynda demalys saıabaǵy ashyldy. Sharaǵa Almaty oblysynyń ákimi Amandyq Batalov arnaıy qatysty, – dep habarlaıdy Qamshy.kz aqparat agenttigi.
Elbasy Nursultan Nazarbaev óziniń baǵdarlamalyq maqalasynda: "Patrıotızm eń aldymen týǵan jerge, óz aýylyna, qalasyna, óńirine jáne kishi otanyna degen súıispenshilikten bastaý alady", – degen bolatyn. Osy sózdi alǵa tartqan Jetisýlyq kásipkerler Memleket basshysynyń "Týǵan jer" baǵdarlamasyn iske asyrýǵa jumyla kirisip ketkendigi kópshilikti qatty qýantty. Memleket basshysynyń tapsyrmasyn joǵary deńgeıde atqaryp júrgen kásipkerler jumysyna óz rızashylyǵyn bildirgen Almaty oblysynyń basshysy Amandyq Ǵabbasuly saıabaqtyń ashylýyna kelgen aýyl turǵyndaryn quttyqtady.
"Búgingi kúni Jetisý ólkesiniń áleýmettik ınfraqurylymyn damytýǵa ólsheýsiz úlesin qosyp kele jatqan Almaty oblysynda týyp ósken esimi elge taraǵan ataqty mesenattardyń bary belgili. Osy tusta "Týǵan jer" baǵdarlamasy aıasynda eń alǵashqy joba dál osy Eńbekshiqazaq aýdanynda júzege asyrylyp jatqandyǵyn erekshe atap ótken jón. Bul barshamyz úshin jaqsy úlgi bolmaq. Osyndaı ıgi ister oblysymyzdyń ózge de aımaǵynda ultjandy azamattardyń qoldaýymen atqarylady dep oılaımyn. Barshańyzdy taǵy bir márte osynaý ásem demalys saıabaǵynyń ashylýymen shyn júrekten quttyqtap, árbir isterińizge sáttilik tileımin", – dedi aımaq basshysy.
Berekesi men birligi jarasqan Ashybulaq aýylynda salynǵan jańa demalys saıabaǵyn salýǵa Sabırovtar otbasynyń sińirgen eńbegi zor. Olar joǵary tehnologıamen jemister men kókónisterdi ósirýmen aınalysatyn "Amal BIO" JSHS-niń menshik ıesi. 1 gektar aýmaqty quraıtyn saıabaqta shaǵyn fýtbol, strıtbol jáne balalarǵa arnalǵan oıyn alańdary bar. 130 orynǵa arnalǵan konsert zaly da qazirgi zaman talabyna saı jasalǵan.
Saıabaqtyń barlyq aýmaǵy abattandyrylǵan, jaryqtandyrylǵan, 100-den astam jas kóshetter men dekoratıvti gúlzarlar otyrǵyzylǵan. Atalǵan jobany iske asyrýǵa mesenattardyń óz qarajaty esebinen 30 mln. teńge qarajat bólingen.
"Týǵan jer" baǵdarlamasyna qosatyn úles munymen toqtap qalmaıtynyn aıtqan Sabırovtar otbasynyń bolashaqqa qurǵan jospary kópke úlgi bolmaq. Olar aldaǵy ýaqytta Eńbekshiqazaq aýdanyna qarasty Jańa turmys jáne Qazaqstan aýyldarynda da dál osyndaı demalys saıabaqtaryn ashýdy josparlaýda.
