Astanada bolǵan tóbeleske baılanysty túrli pikirler bar, dep jazady Qamshy.kz aqparat agenttigi.
Eske sala ketetin bolsaq, 2 qyrkúıekte saǵat 21.00-de kúzet kompanıasynyń qyzmetkerleri men sheteldik jumysshylar (Úndistan azamattary) arasynda «Abý-dabı Plaza» qurylys alańynyń baqylaý-ótkizý beketinde turmystyq sıpattaǵy janjal oryn alǵan. Osynyń saldarynan soljaǵalaýdaǵy birneshe kóshe jabylǵan.
Osy oqıǵaǵany bireýler turmystyq kıkiljiń dese, endi biri ultaralyq qaqtyǵys dep pikir bildirýde. Kópshilik ózge ulttyń óz jerimizge kelip ózimizdi basynýyn orynsyz dep eseptep, ashýlanyp ta jatyr.
Bılik ókiderinen alǵashqy bolyp mınıstr Dáýren Abaev oqıǵadan kóp ótpeı halyqtan daýryqpaýdy surap málimdeme jasady.
Atalǵan oqıǵaǵa baılanysty Astana qalasynyń ákimi Áset Isekeshev te oqıǵa ornyna tez jetip, jaǵdaıdy óz baqylaýyna aldy. Ákim óziniń feısbýk paraqshasyna bylaı dep jazdy:
«Kúzet mekemesi men sheteldik jumysshylar arasynda turmystyq kıkiljiń týyndaǵan. Qazirgi ýaqytta oqıǵa ornyna memlekettik qyzmetkerler jáne tártip saqshylry jóneltildi. Eki jaq arasynda kelissóz júrgizilip, kıkiljiń sheshildi. Tergeý amaldarynyń nátıjesinde tıisti sharalar qoldanylady. Oqys oqıǵa men arandatýshylyqty boldyrmaý úshin qajetsiz taldaýlardan aýlaq bolýlaryńyzdy ótinemin».
Zańger Aıgúl Orynbek tóbeleske qatysy bar kúzetshiden mán-jaıdy surap, jasaǵan jeke zertteýine saı, kúzet qyzmetkeri ishimdik iship alǵan ındıalyqpen arasynda kıkiljiń oryn alyp, arty tóbeleske ulasqanyn jetkizgen. Indıalyq kúzetshini uryp, qolyn syndyrypty. Osy oqıǵadan keıin ındıalyq óziniń bir top dostaryn shaqyryp, ındıalyqtar men qazaqtardyń arasynda tóbeles bolypty.
Qaqtyǵys saldarynan Úndistannyń eki azamaty túrli dene jaraqatymen medısınalyq mekemege jetkizilgen.
Indıalyqtar men qazaqtardyń arasynda bolǵan tóbelestiń aqıqaty men ańyzy biraz ýaqyttan keıin belgili bolatyn shyǵar.
Ázirge belgili aqparat boıynsha, «Abý-dabı plaza» qurylys alańyndaǵy baqylaý-ótkizý beketinde quqyq qorǵaý organdarynyń zańdy talaptaryna baǵynbaǵan 8 adamǵa ákimshilik shara qoldanyldy.
