Elimizdegi úkimettik emes uıym ókilderi latyn qarpine kóshýdi qoldaıdy. Bul týraly Halyqaralyq «Janashyr» qorynyń prezıdenti Jańyl Ápetova málimdedi, dep habarlaıdy Qamshy.kz aqparat agenttigi QR Din isteri jáne azamattyq qoǵam mınıstrliginiń baspasóz qyzmetine silteme jasap.
Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda 2025 jyldan bastap latyn álipbıine kóshýge kirisýimiz kerektigin jáne bolashaqta barlyq saladaǵy is-qaǵazdar men oqýlyqtar da osy qarippen jazylýy tıis ekenin qadap aıtty.
Prezıdentimiz latyn álipbıine kóshýdiń naqty joldaryn aıtyp, osy másele zıaly qaýym arasynda keńinen talqylanýy qajet ekenin alǵa tartty. Sondyqtan, kún taqyrybynda ótkir turǵan, búginde qoǵamda qyzý talqylanyp jatqan latyn álipbıine kóshý máselesine baılanysty oı qozǵaý úshin ǵalymdardy, kópti kórgen kózi ashyq, kókiregi oıaý azamattardyń qatysýymen Halyqaralyq «Janashyr» qory keshendi sharalardy júzege asyryp keledi.
«Din isteri jáne azamattyq qoǵam mınıstrliginiń qoldaýymen «Azamattyq bastamalardy qoldaý ortalyǵy» komersıalyq emes aksıonerlik qoǵamynyń granttyq baǵdarlamasynyń aıasynda «Halyqtyń ulttyq-mádenı birligin saqtaýdaǵy zıalylardyń róli» taqyrybyndaǵy jobasy aıasynda ótip jatqan dóńgelek ústelder men konferensıalarda, kolejder men mektepterdegi kezdesýlerde halyqtyń latyn qarpine kóshý jónindegi pikirlerin bilýdemiz» - dep atap ótti uıym basshysy Jańyl Ápetova.
Sharalardyń qatysýshylaryna arnalǵan saýalnamalarda da osy taqyryptardaǵy pikirlerin bildirý suralǵan. Ótkizilgen sharalardyń nátıjesi kórsetkendeı, qatysýshylardyń 80-90 paıyzy latyn árpine kóshýdi qoldaıtyndyqtaryn bildirýde.
Jańyl Ápetovanyń aıtýynsha, búgingi tańda kırıllısa jazýyn álemniń 12 memleketi ǵana paıdalanady eken. Al qalǵan memleketterdiń kóbi latyn álipbıin qoldanady. Demek, bul keń taralǵan jazý. Búginde álemniń ár túkpirinde 5 mıllıonǵa jaqyn qazaq turady. Onyń 80 paıyzy latyn álipbıin qoldanady. Iaǵnı, biz bolashaqta latyn álipbıine kóshsek, sol qazaqtarmen jaqyndasa túsemiz. Bul – syrttaǵy aǵaıynnyń kópten kútken armany.
«Biz, qazaqstandyqtar kópshilik bolyp latyn qarpine kóshýge ázir ekenimizdi kórsetip, osyndaı mańyzdy qadamǵa barýǵa aýyzbirshilik tanytqanymyz jón dep bilemiz» - sózin túıindedi «Janashyr» qorynyń prezıdenti Jańyl Ápetova.
