Nursultan Nazarbaev jumys saparyn qorytyndylap, Almaty qalasy men Almaty oblysynyń ahýaly jóninde aıtty, dep habarlaıdy Qamshy.kz aqparat agenttigi Aqordaǵa silteme jasap.

– Almaty qalasy ákimdigi jurtshylyqpen birlesip, ınfraqurylymdy júıeli túrde jaqsartýǵa, turǵyndardyń jaıly ómir súrýi úshin jaǵdaı jasaýǵa baǵyttalǵan jumystardy tabysty atqaryp jatqanyn atap ótkim keledi. Panfılov, Jibek joly kóshelerine keshendi qaıta jóndeý júrgizildi. Jaıaý júrginshilerdiń serýendeýine arnalǵan alańdar jasaqtaldy. Sondaı-aq, qalany kógaldandyrý, aryq júıesin tolyq jetildirý jónindegi jumystardy jalǵastyrý qajet. Qalada eki aýdan – Alataý jáne Naýryzbaı aýdandary quryldy. Bıznespen aınalysý úshin qajetti jaǵdaılar jasaldy. Qazir mundaǵy kásipkerlerdiń belsendiligi arta tústi.

Jalpy, Almaty iri ekonomıkalyq ortalyq retinde qalyptasyp, elimizdiń álemdik deńgeıdegi zamanaýı megapolısine aınaldy. Táýelsizdik jyldarynda qala ekonomıkasy qarqyndy túrde ósip, joǵary kórsetkishterge jetti. Maǵan usynylǵan málimetterge sáıkes, búginde Almaty ekonomıkasynyń kólemi Grýzıanyń ishki jalpy óniminen 2 ese, al Qyrǵyzstan men Tájikstannan – 5 esedeı artyq. Bul – tek qalanyń ǵana emes, jalpy elimizdiń tabysty damýynyń kórsetkishi. Qazir Almaty respýblıkalyq búdjettiń donory bolyp sanalady. Ol respýblıka boıynsha shaǵyn jáne orta bıznesti damytýdyń úzdik kórsetkishterine qol jetkizip otyr, – dedi Elbasy.

Budan bólek, Elbasy Almaty oblysynda da kóp jumystardyń atqarylyp jatqanyn atap ótti. Sonyń ishinde, óńirdiń áleýmettik-ekonomıkalyq damýy ozyq qarqynmen júzege asyrylýda. Bul ásirese aýyl sharýashylyǵy, qurylys, kólik-tranzıt salalarynda aıqyn baıqalýda.

Sońynda Memleket basshysy Almaty qalasy men Almaty oblysynyń órkendeýine jáne odan ári damýyna tilektestik bildirdi.