«Ramada Plaza Astana» qonaq úı kesheninde «Dinı ekstremızm men terorızmniń aldyn alý máselelerinde qoǵamdyq ınstıtýttardyń róli» taqyrybynda respýblıkalyq konferensıa ótti dep habarlaıdy Qamshy.kz aqparat agenttigi.

İs-shara Qazaqstan Respýblıkasynda dinı ekstremızm men terorızmge qarsy is-qımyl jónindegi 2013-2017 jyldarǵa arnalǵan memlekettik baǵdarlama sheńberinde iske asyryldy.

Konferensıanyń maqsaty – dinı ekstremızm men terorızmge jáne onyń qaýip-qaterine úkimettik emes uıymdardyń, sonyń ishinde qoǵamnyń nazaryn aýdarý, sondaı-aq olardyń Qazaqstanda taratylýyn aldyn alý.

Konferensıany Qazaqstan Respýblıkasy Din isteri jáne azamattyq qoǵam vıse-mınıstri Berik Saqbaıuly Aryn quttyqtaý sózimen ashty.

«Din salasynda oryn alyp otyrǵan ózgeristerden týyndaıtyn                                      qaýip-qaterler bizden sáıkesinshe áreket etýdi jáne tıisti sharalardy qabyldaýdy talap etedi. Bizdiń basty qundylyǵymyz – elimizdiń turaqtylyǵy men beıbit ómiri – dinı ekstremızm men terorızmniń aldyn alýdaǵy azamattyq qoǵam ınstıtýttarymen birlesken tıimdi jumysymyzdyń myzǵymas irgetasy bolyp tabylady»,- dea atap ótti  vıse-mınıstr.

Jalpy konferensıaǵa 120-dan astam adam qatysty, olardyń ishinde múddeli memlekettik organdar, destrýktıvti dinı aǵymdardan zardap shekken tulǵalarmen aldyn alý jáne ońaltý salasynda qyzmet etetin úkimettik emes uıymdar,  mádenıet jáne sport salasyndaǵy qoǵamdyq, jastar uıymdarynyń jáne joǵary oqý oryndarynyń ókilderi jáne t.b. bar.

Sharanyń mańyzdylyǵyn eskere otyryp, spıkerler retinde QR Parlamenti Májilisiniń depýtaty Baqytbek Smaǵul, QR Prezıdenti Ákimshiliginiń Qazaqstan halqy Assambleıasy Hatshylyǵy meńgerýshisiniń orynbasary Sháýenov Erbol Soltybekuly jáne basqalar shaqyryldy.

Ońaltý jumystarynyń teologıalyq jáne psıhologıalyq aspektileri konferensıa barysynda bedeldi  teologtar jáne dinı birlestikterdiń ókilderiniń, onyń ishinde N.Ótpenovtiń, D.Baıdektiń, Sh.Kerimniń, A.Sabdınniń baıandamalarynda qozǵaldy.

Konferensıa kezinde azamattardyń, onyń ishinde jastardyń, sondaı-aq sport ókilderiniń destrýktıvti dinı aǵymdarǵa tartylý sebepteri men mehanızmderi máseleleri qarastyrylyp,  jalǵan dinı aǵymdardyń sıpattamalary jáne t.b. máseleler qozǵaldy.

Ońaltý jáne keńes berý ortalyqtarynyń ókilderi destrýktıvti dinı aǵymdardyń ustanýshylarymen aldyn alý jumystaryndaǵy is-tájirıbelerimen  bólisti.

«Qazaqstan jastarynyń kongresi», «Qazaqstan KVN odaǵy» RJQB tárizdi jastar qanatynyń ókilderi jáne basqalary jas urpaqty ulttyq dástúr, patrıottyq sezim aıasynda, sondaı-aq sport pen ónerge baýlý arqyly tárbıeleý mańyzdylyǵyn atap ótti. 

Jalpy, konferensıa konstrýktıvtik rýhta ótkizildi, túrli qoǵamdyq ınstıtýttar ókilderi halyq arasynda, onyń ishinde jastar arasynda dinı ekstremızm men terorızmniń aldyn alýyna baǵyttalǵan jumystardy jaqsartý boıynsha ózderiniń usynystaryn jetkizdi jáne tájirıbelerimen bólisti.