«Nur Otan» partıasy Tóraǵasynyń Birinshi orynbasary Muhtar Qul-Muhammed ındýstrıaldy-ınnovasıalyq damýdyń 2015-2019 jyldarǵa arnalǵan memlekettik baǵdarlamasyn júzege asyrý barysy jóninde partıalyq tyńdaý ótkizdi.

Baǵdarlama aıasynda tek sońǵy 7 jyldyń ishinde elimizde 500-ge jýyq jańa ónim túrlerin óndirý isi qolǵa alynǵan. Búginde «Nur Otan» partıasy óziniń Saılaýaldy baǵdarlamasynda naqty kórsetilgen bazalyq salalar men ınovasıany damytý mindetterin júzege asyrý baǵytynda júıeli jumystar júrgizýde. Sonyń nátıjesinde 2021 jyly elimizde túrli-tústi metalýrgıa eksporty 20 paıyzǵa ósedi dep kózdelýde. Sondaı-aq, munaı-gaz salasynda básekege qabilettilik artyp, energıamen qamtamasyz etetin kásiporyndardyń aıasy keńeımek. Bul mindetterdiń barlyǵy 2015 jyldan bastap ekinshi bes jyldyǵy júzege asyrylyp kele jatqan ındýstrıaldy-ınnovasıalyq damý memlekettik baǵdarlamasyna da engizilgen.

Baǵdarlama sheńberindegi osyndaı basymdyqtarǵa toqtalyp ótken Muhtar Qul-Muhammed: «Elbasynyń tapsyrmasymen ındýstrıalyq-ınnovasıalyq damý baǵdarlamasy aıasynda 1000-nan astam jańa kásiporyndar salyndy. Ony júzege asyrýǵa 5 trıllıon teńgeden astam qarajat bólindi. Elimizge búkil dúnıejúzine tanymal asa iri kompanıalar kelip, mıllıardtaǵan dollar ınvestısıa saldy jáne eń ozyq tehnologıalardy ákeldi. Dál osy jańa kásiporyndar munaı baǵasy úsh esege tómendegen kezde el ekonomıkasynyń turaqty damýyn qamtamasyz etip otyr», – dedi.

İs-shara barysynda Investısıalar jáne damý mınıstri Jeńis Qasymbek baǵdarlama aıasynda atqarylǵan jumystar jóninde baıandama jasady. Sonymen qatar partıalyq tyńdaýǵa qatysqan Májilis depýtattary mınıstrge ózderin alańdatqan suraqtaryn qoıyp, naqty jaýaptar aldy.

Búginge deıin baǵdarlama boıynsha tórt basty ındıkatordyń úsheýi júzege asyrylǵan. Elimizde jańa ónerkásiptik ónimder óndirilip, zamanaýı tehnologıalar ákelindi jáne qosymsha jumys oryndary ashyldy. Alaıda, bul jetistikterge toqmeıilsýge bolmaıtynyn, qaıta budan da kúrdeli jobalardy qolǵa alyp, batyl qımyldaýymyz kerektigin aıtqan Muhtar Qul-Muhammed: «Nur Otan» partıasy Elbasy tapsyrmalary men barlyq prezıdenttik baǵdarlamalardyń oryndalýyna erekshe partıalyq baqylaý júrgizýdi jalǵastyra beredi», – dedi.