Bıylǵy jyly Alashorda úkimetiniń qurylǵanyna 100 jyl, Alash arysy Eldes Omarulynyń týǵanyna 125 jyl tolyp otyr. Osydan birneshe aı buryn «Qzmshy.kz» aqparattyq agenttigi «ALASH ARYSY ELDES OMARULYNYŃ SHYǴARMALAR JINAǴYN SHYǴARÝ ÚSHİN QOLDAÝ QAJET!» degen maqala jarıalap,«Naýryzdyń 15-inde Ahmet Baıtursynulynyń eńbekterine arnalǵan ǵylymı konferensıada Ahmet Baıtursynov atyndaǵy QMÝ profesory, jazýshy, fılologıa ǵylymdarynyń kandıdaty Aqylbek Shaıahmet Qostanaıdan arnaıy kelip Baıtursynov murasy týraly baıandama jasady» - dep atap kórsetip, jazýshy jınaqtaǵan kitaptan úzindiler basqan edi. Sol ıgi bastama jalǵasyn taýyp, Qostanaı oblysynyń ákimi Arhımed Muhambetovtyń demeýshiligimen Astanadaǵy «Folıant» baspasynan kórnekti memleket qaıratkeriniń shyǵarmalar jınaǵy qazaq jáne orys tilderinde myń dana taralymmen jaryq kórdi. Kitapty qurastyrǵan ǵylym doktory Marat Shýaqaev pen profesor Aqylbek Shaıahmet.
Alash ardaqtysy Eldes Omarulynyń shyǵarmalar jınaǵyna onyń qazaq jáne orys tilderinde jazylǵan shyǵarmalary engizildi. Biraq, ǵalymnyń eńbekteri bul kitapta túgel qamtylmaǵan. Kóptegen týyndylary áli jınastyrylmaǵan nemese arab jáne latyn árpinen kırıll árpine kóshirilmegen. Bul týyndylardy muraǵattan taýyp, jarıalaý keleshekte ǵalymdardyń úlesinde. Ázirshe qolda bar shyǵarmalar ǵana oqyrmandar nazaryna usynylyp otyr. Kitap ádebıet zertteýshilderine, tilshi ǵalymdarǵa, Alash tarıhy men ádebıetine qyzyǵýshylyq tanytqan barsha oqyrmanǵa arnalǵan.
Tórt bólimnen turatyn jınaqtan Eldes Omarulynyń maqalalary jáne baıandamalarymen, muraǵattar materıaldarymen, Eldes Omaruly týraly pikirlermen jáne qujattarmen tanysýǵa bolady.
Kitapta Mahmut Qashqarı atyndaǵy túrki álemine sińirgen eńbegi úshin halyqaralyq syılyqtyń, «Alash» halyqaralyq syılyǵynyń laýreaty Aqylbek Shaıahmettiń alǵysózi berilgen.
