Astana qalasynyń «Dáýlet» sport kesheninde Qazaqstan Respýblıkasy Ulttyq ulany Bas qolbasshysynyń Kýbogy úshin jekpe-jek urystan halyqaralyq týrnırdiń saltanatty ashylýy bolyp ótti dep habarlaıdy Qamshy.kz aqparat agenttigi.
Atalmysh sharanyń ashylýyna QR İshki ister mınıstri polısıa general-polkovnıgi Qalmuhanbet Qasymov, Ulttyq ulan Bas qolbasshysy general-leıtenant Rýslan Jaqsylyqov, ofıserler men sarbazdar, ózara qarym-qatynas organdarynyń basshylary, qoǵamdyq uıymdar men áskerı-patrıottyq uıymdardyń ókilderi, mektep oqýshylary qatysty.
Saltanatty ashylý kezinde sóz sóılegen İshki ister mınıstri Qalmuhanbet Qasymov týrnırge qatysýshylardy jarystyń bastalýymen quttyqtap, sportshylarǵa myqty báseke tiledi.
- Jekpe-jek urysty áskerdiń qoldanbaly sport túri retinde keń nasıhattap, áskerıler arasynda sport pen salamatty ómir saltyn qalyptastyrý maqsatynda Ulttyq ulan Bas qolbasshysynyń Kýbogine arnalǵan týrnırdi ótkizý ıgi dástúrge aınaldy. Elbasy Nursultan Ábishuly Nazarbaevtyń «Qazaqstan 2050» strategıasynda dene shynyqtyrý men sport únemi memlekettiń erekshe qamqorlyǵynda. Bul úshin Memleket basshysy men Úkimet tarapynan úlken kóńil bólinetini aıtylǵan», - dedi vedomstvo basshysy.
Budan soń Qalmuhanbet Qasymov saltanatty sharaǵa arnaıy qonaq retinde kelgen «Rıo-2016» jazǵy Olımpıada oıyndarynyń jeńimpazy, boksshy Danıar Eleýsinovty ortaǵa shaqyryp, ishki ister organdary qyzmetkerleri arasynda buqaralyq sportty damytýǵa qosqan úlesi úshin «QR İshki ister organdarynyń qurylǵanyna – 25 jyl» keýde belgisimen marapattady.
Atap ótý kerek, Ulttyq ulan Bas qolbasshysy Kýbogine arnalǵan jekpe-jek jarysy jyl saıyn uıymdastyrylady.
Bıyl elimizdiń kúsh qurylymdary sport komandalarynan bólek Reseı Federasıasy Ulttyq gvardıasynyń áskerleri, Qytaı Halyq Respýblıkasy Halyqtyq qarýly polısıasy, Qyrǵyzstan Respýblıkasy Ulttyq ulanynyń sport komandalary qatysýda. Bas-aıaǵy 150ge tarta sportshydan turatyn 15 komanda baq synaýda. Týrnır eki kúnge sozylmaq.
