Jambyl oblysynda jol apatyna sebepker bolǵan toı kortejindegi kólik júrgizýshisine qarsy qylmystyq is qozǵaldy, dep jazady Qamshy.kz aqparat agenttigi.

KTK jańalyqtar qyzmetiniń habarlaýynsha, joǵary jaldamdyqpen kele jatqan «Gelendvagen» «Lada» jeńil kóligimen soqtyǵysqan. Nátıjesinde bir otbasy túgeldeı ómirden ótti. 27 jastaǵy júrgizýshi 10 jylǵa bas bostandyǵynan aıyrylýy múmkin. Biraq áıeli, balasy jáne nemeresinen aıyrylǵan otaǵasy qandaı jaǵdaı bolmasyn qylmyskerdi budan da aýyr jaza kútip turǵanyna senimdi boldy.

«Men sizdi aqtyq demim taýsylǵansha qarǵap ótetin bolamyn. Siz meniń áıelimdi, balamdy, nemeremdi óltirdińiz. Siz... Siz meni óltirdińiz. Jaqsy, jaqsy. Men shyǵaıyn! Munyń bári ótirik, ári qaraı otyra almaımyn!», - dedi kóz jasyna erik bergen Agapasha Amrýlaev.

Qaıǵyly oqıǵa aýyl turǵyndarynyń esinde máńgige qalyp qoıdy. Kýágerler kortej bir aýyldan qalyńdyqty alyp, kelesi aýyldan ózge qonaqtardy alýǵa jónelgen. Kóliktiń jartysy ozyp ketken, al eki «Gelendvagen» keshikkendikten, aldaǵy kólikterge tez arada jetip alýdy kózdegen. Qaıǵyly oqıǵa sol ýaqytta oryn alǵan.

Tergeý málimetterine sáıkes, jol talǵamaıtyn kólik «Ladany» 50 metrge deıin súırep áketken. Eki jasar qyz ben 55 jastaǵy áıel oqıǵa ornynda qaıtys boldy. Taǵy eki áıel aýyr jaraqatpen aýrýhanaǵa jetkizildi. Onyń biri alty aılyq sábıge júkti bolǵan otbasynyń kelini edi. Oqıǵa ornyna birinshi bolyp otaǵasy keldi. Onyń 23 jastaǵy uly alǵashynda tiri bolǵan.

«Ol oryndyqta otyrǵan. Onyń kókirek qýysy synǵan. Kómeıi synǵan. Baýyry jarylǵan, búıregi jyrtylǵan, ishinde saý dúnıe qalmaǵan. Solaı bola tura ol maǵan tesile qarady da, kúldi. Menimen qoshtasty. Al men muny bilmegenmin. Menimen qoshtasyp jatqanyn ańǵarmappyn da...», - dedi ákesi.

Al aıyptalýshy 10 jylǵa bas bostandyǵynan aıyrylýy múmkin.

«Men tek keshirim suraımyn. Keshirińizder, ótinemin. Dál osylaı bolǵanyn qalaǵan joqpyn», - dedi «Gelendvagendi» basqarǵan Nurbolat Sholpanqulov.