Bı-bı-sı jýrnalısi Irak pen Sırıaǵa barǵan áıelderdiń analarymen sóılesti. Kezdesý Sheshenstannyń Máskeýdegi ókildiginde ótti dep jazady Qamshy.kz aqparat agenttigi.
«Men Erejebova Jannet Daǵystannyń týmasymyn. Balalarym 2015 jyly 13 shildede Túrkıaǵa ketken. Birinshi qyrkúıekte ol jumysqa kirisýi qajet edi. Ol mektepte aǵylshyn tilinen sabaq beretin. Úlken balasy da birinshi synypqa barýy kerek edi. Qyzymdy ózim shyǵaryp saldym. Ol otbasyna, jumysyna oralady dep oıladym. Eki aptadan keıin belgisiz nomerden qyzymnyń atynan habarlama keldi. Onda «Anashym, saǵan eshteńe aıta almaımyn. Úıge orala almaımyn» dep jazylǵan. Habarlamany qyzym jazdy ma, álde basqa bireý me bilmeımin.
Osydan keıin Reseıdiń Túrkıadaǵy elshiligine hat jazdym. Alaıda elshilik ókilderi qyzym, kúıeý balam men jıenderimdi tappady. Eki aı boıy qyzymnan eshqandaı habar kelmedi. Telearna arqyly Eýropaǵa baratyn emıgranttardy kórsetetin baǵdarlama arqyly da izdedim. Qyzym bálkim Eýropaǵa ketken bolar dep oıladym. Sýǵa batqan emıgranttardyń ishinen de izdedim. Alaıda qyzym týraly qandaı da bolmasyn aqparat tabý múmkin bolmady.
Úshinshi aıda qyzym baılanysqa shyqty. Qyzym óksip jylady.
«Anashym, keshirshi meni. Men bilmedim. Men balalarym úshin osynda keldim» dedi. Munymen ne aıtqysy kelgenin túsinbedim.
Qyzym nelikten ol jerge barǵanyn bilý úshin kúıeý balamnyń baılanysqa shyǵýyn talap ettim. Keıin qyzymnan kúıeý balamnyń kóz jumǵanyn estidim.
«Qaıdasyń? Janyńda kim bar?» dep suraǵan edim, qyzym ondaı aqparat berýge tyıym salynǵanyn aıtty.
2016 jyly 30 qarashada qyzym habarlasty. «Anashym, jaǵdaıymyz aýyr. Eger uzaq ýaqyt baılanysqa shyqpasam, balalarymdy izdep taýyp, elge alyp ket. Olardy munda qaldyrma» dedi qyzym.
Jaqynda Sırıa, Iraktan kelgen áıelderge qyzym men jıenderimniń fotolaryn jiberdim. Olardyń biri balalardy tanydy. Jıenderimdi jaqynda kórgenin aıtty. Kelesi kúni olardy basqa lagerge aparý kerek bolǵan eken. Basqa aqparat joq. Balalarymdy tabýǵa kómektesińdershi» dedi amaly taýsylǵan ana.
Qyzyn taba almaı júrgen analardyń biri Fatıma Atagaeva.
«Men qyzdaryn izdep júrgen analardyń birimin. Qyzym 2014 jyly Volgograd oblysynan shetelge ketken. Qyzymmen sóıleskende onyń aıtqan alǵashqy sózi, «Anashym, shyn sózim, men qaıda ne úshin bara jatqanymdy belmedim. Ózge elge jetip, betime ystyq jel soqqanda munda ne istep júrmin dep oıladym» dedi ol. Ol tórt balasymen ketken. Bir balasyn sonda bosandy. Sońǵy ret onymen 2-shi aqpanda sóılestim. Olardyń qaıda, ne istep júrgeninen múlde habarsyzbyn» deıdi Fatıma Atagaeva.
