Qorǵaýshy Suńqar Nurmaǵambetov Qytaıda ómir boıyna sottalǵan qazaqstandyq Aqjarqyn Turlybaıdyń aqtalýyna úmit bar ekenin aıtty. Bul týraly qorǵaýshy QazAqparat tilshisine bergen suhbatynda málim etti. Sondaı-aq Reseı azamaty Marıa Dapırkanyń da taǵdyryna baılanysty boljamymen bólisiti.  

«Aqjarqyn óz kinásin moıyndamaı otyr. Sondyqtan ol aqtalady dep senip otyrmyz», – dedi Suńqar Nurmaǵambetov suhbatynda.

Sonymen qatar, Nurmaǵambetovtyń reseılik Marıa Daprıkany da qorǵap júrgenin aıta keteıik. Onyń aıtýynsha, is Marıanyń qylmystyq oı-pıǵylyn anyqtaý úshin Hoshımın prokýratýrasyna jiberildi. Sot úkiminiń oryndalýy Reseıde bolýy yqtımal. Sondaı-aq Aqjarqynnyń da halyqaralyq kelisim boıynsha Qazaqstanǵa beriletinin jetkizdi. Alaıda onyń birneshe sharty bolýy múmkin.

Aıta keteıik, Aqjarqyn men Marıa esirtki tasmaldady degen aıyppen sottaldy. Eki qyzdyń da oqıǵasy 2014 jyly bolǵan. Qytaıdyń Gýanchjoý áýejaıynda qazaqstandyq Aqjarqyn Turlybaıdyń sómkesinen 4,5 keli esirtki tabylǵan. Al Vetnam polısıasy Marıanyń sómkesinen 2,7 keli esirtki tapqan.

Esirtkimen kúres Ortalyq Azıa óńirlik aqparattyq ortalyǵynyń habarlaýynsha, Aqjarqyn men Marıa Daprıka nıgerıalyq narkomafıanyń qurbany bolǵan.

«Eki jaǵdaıda da transulttyq esirtki toby jumys istegeni kórinip tur. Olar burynǵy Keńes odaǵy elderindegi adamdardy esirtki bıznesine jegýmen aınalysyp júrgen. Qylmyskerler adamnyń senimine kiredi. Onymen mahabbat qurýy da múmkin. Aqjarqyn Almatydaǵy dámhanalardyń birinde daıashy bolyp jumys istegen. Barmen Djonnı de osy dámhanada qyzmet etken. Djonnı Aqjarqynǵa taýar jetkizip bershi dep ótinedi. Aqjarqynǵa QHR QK 374 babymen qylmys jasady degen aıyp taǵyldy.

Bul bap boıynsha, ol 20 jylǵa nemese ómir boıyna bostandyǵynan aırylyp nemese ólim jazasyna kesilýi múmkin. 2017 jyldyń qazanynda osy iske núkte qoıylýy yqtımal. Biraq ýaqyty ózgerýi de ǵajap emes», - dedi Suńqar Nurmaǵambetov.