Qyrǵyzstan mektepterindegi oqýshylardyń tamaqtaný tártibi qandaı?

Qyrǵyzstanda búginde 2018 mektep tirkelgen. Memlekettik baǵdarlama boıynsha bastaýysh synyptyń 442 myń oqýshysy kúndelikti ystyq tamaqpen qamtamasyz etilgen. Jyl saıyn osy maqsatta 430 mıllıon som jumsalady.

Memlekette myńdaǵan bala arnaıy standartqa sáıkes tamaqtanady. Mamandar tamaqtanbaı júrýdiń adam densaýlyǵyna zıan ekenin jıi qaıtalap otyrady.

Bılik bastaýysh synyp oqýshylarynyń tamaqtanýy úshin ár oqýshyǵa kún saıyn 7 somnan bólgen. Tipti balanyń qalypty túrde boı jetilýin eskerý maqsatynda azyq-túlik te arnaıy tańdalynady.

Osy oraıda memleket bıligi BUU-nyń azyq-túlik qaýipsizdigi baǵdarlamasynyń kómegine júgingen. 2013 jyly Qyrǵyzstanda atalmysh baǵdarlama júzege asa bastady.

Óz kezeginde Qyrǵyzstandaǵy Japonıa elshiligi de memleketke qoldaý tanytty. Elshilik Qyrǵyzstannyń Shý jáne Ystyqkól oblystarynyń 16 mektebine asqana jabdyqtaryn syılady.

BUU-nyń azyq-túlik qaýipsizdigi baǵdarlamasy tóraǵasynyń orynbasary Keıko Izýshı balanyń densaýlyǵyna búginnen bastap mán berý kerek ekenin eskertti. Sebebi bala – ulttyń bolashaǵy.

«Turmys-jaǵdaıynyń tómendigine qaramastan Qyrǵyzstanda ár mektep oqýshysy ystyq tamaqpen qamtamasyz etilgen. Qarny toq balanyń oqý úlgerimi de jaqsy bolady, bilimdi bala memleketi úshin ter tógedi. Búgingi oqýshylar – erteń memlekettiń tutqasyn ustaıtyn iri tulǵalar. Olarǵa qamqor bolý – bizdiń mindetimiz».

Qarjy jetispeýshiliginiń kesirinen Qudaıberdıev atyndaǵy mektep ujymy bastaýysh synyp oqýshylarynyń ystyq tamaqpen qamtamasyz etilýin óz qarjylaryna uıymdastyrǵan jáne oqýshylardyń kúndelikti tamaqtanýyn jiti baqylaıdy. Máselen, mektepte 21 jyl boıy qyzmet atqaryp kelgen sharýa meńgerýshisi oqýshylardy óz baqshasynyń jemisterimen tamaqtandyrady. Aǵashty er adam óz qolymen otyrǵyzǵan.

Al bıologıa pániniń oqytýshysy Talantbek Alıev halyqaralyq donorlar men jergilikti bıliktiń kómegimen qıarlardy saqtaıtyn jylyjaı saldyrdy.