Kúz mezgili kelip, kún sýytqan sátten bastap bılik basyndaǵy «myrzalardyń» ýaıymy - jańa jyl merekesi.
Búgin qalalyq máslıhattyń ekonomıka jáne búdjet turaqty komısıasynyń otyrysynda Almaty ákimdigi depýtattardan jańa jyl merekesine qalany bezendirýge 429 mıllıon 323 myń teńge qarjy suraǵan.
Jańa jyl merekesine áli úsh aı ýaqyt bar. Alaıda bılik basyndaǵylar jańa jyl merekesine oraı qalany bezendirýge qazirden bastap bas qatyrýda.
Joǵaryda atap ótkendeı, otyrys barysynda depýtattar basqarmadaǵylardyń aqsha bólý týraly usynysyn maquldap, qabyldaǵan. Almaty qalasynyń Ekonomıka jáne búdjettik josparlaý basqarmasynyń basshysy İlıas Óserovtyń aıtýynsha, suralǵan aqsha aýdandyq ákimdikterge bólinedi eken.
Jańa jyl merekesi Keńes zamanynan beri toılanyp kele jatyr, halyqtyń sanasyna ábden sińip qalǵan. Sonyń saldarynan Táýelsizdik alǵanymyzǵa 25 jyl, ıaǵnı bir shırek ǵasyr bolsa da elimizdiń eldigin kórsetetin, mańyzdy merekemiz 31 jeltoqsanda toılanatyn «jańa jyl» merekesiniń kóleńkesinen ári aspaı keledi. Degenmen bul merekeniń bizdiń ultymyzǵa jat ekendigin bir emes, búkil halyq biledi.
Búgingi ótken otyrysta İlıas Óserbekov bylaı degen: «Biz mádenıet basqarmasyna jańa jyldyq bezendirýge aqsha berip qoıdyq. Biraq ol aqsha basqarmadaǵylarǵa jetpeı jatyr, sebebi olar qalamyzdyń basty bólikterin bezendiredi. Aýdandaǵylar osy aqshaǵa ózderi magıstraldyq kósheler men kópirlerdi bezendirý kerek. Biryńǵaı konsepsıa bolýy tıis, árıne, pishinder ártúrli bolsa bolady, biraq túster birdeı bolý kerek».
Basshylyqtyń bul sózderine qarasaq, olar Qazaqstan Respýblıkasynyń Táýelsizdik merekesin qaperine de almaıtyn sekildi, sebebi jańa jylǵa bezendirý barynsha joǵary deńgeıde bolý qajet eken.
Iá, sanamyzǵa ýytyn ábden sińirgen bul dástúrden aryla almaımyz, bezendirý jumystary arqyly qalanyń sáni de kirip qalatyny ras. Alaıda qanshama qazaqtyń qanymen, kóz jasymen kelgen táýelsizdik merekemiz nege umyt qalýy tıis? Barsha jurtshylyqty tolǵandyryp, jaýabyn taba almaı kele jatqan bir suraq jyl saıyn qoıylady: Nege jańa jyl merekesine daıyndyq óte erte bastalady? Táýelsizdik merekesinen jańa jyldyń nesi artyq?
Mundaı saýaldar ár jerde qoıylyp, bılik basyndaǵylarǵa jaýyr bolǵanymen, munyń jaýabyn bılik ókilderiniń biri de bere almady.
Jańa jylǵa daıyndyqty úsh aı buryn bastap, jańa jyldan soń da úsh aı boıy toılatatyn halyq búginde joq ekenin, bul mereke qazaq ulty úshin óz mańyzyn joıyp kele jatqandyǵyn ár aımaqtyń ákimdikteri, túrli shendi qyzmette otyrǵan orysquldar áli túsine almaı kele jatqan sekildi.
Eń soraqysy – jyl saıyn árbir mekeme basshylyǵyna, qyzmetkerlerge, tipti, kishigirim dúńgirshektegi satýshylarǵa deıin ákimdikter jańa jyl merekesine oraı daıyndyqty úsh aı buryn mindettep, tapsyrady. Olardyń sheshimine qarsy kelgen jaǵdaıda aıyppul salamyz dep kesip aıtady. Iaǵnı, ózge ulttyń merekesin toılamaı, qajet etpeıtin adam aıyppul tólep, tártip buzýshy atanady.
Áleýmettik jeli qoldanýshysy Nurbolat Ábilhan óz basynan ótken jaǵdaıdy baıandaı kele, vıdeoúndeý jarıalap, jańa jyl merekesinen elimizdiń Táýelsizdik merekesi men Respýblıka kúniniń mańyzy zor ekendigin aıtady.
Qorytyndylaı kele, ózge ult merekesine daıyndyqty úsh aı buryn erte bastaıtyn basshylyqqa mynadaı saýal qoıǵym keledi: Jańa jyl merekesine oraı bir qalany bezendirýge ketetin 429 mıllıon teńge qarjynyń Táýelsizdik merekesi úshin, tym quryǵanda, 4 mıllıony jumsalady ma?
