Búgin Úkimettiń selektorlyq rejımdegi otyrysynda Premer-Mınıstr Baqytjan Saǵyntaev Qaraǵandy oblysynyń ákimi Erlan Qoshanovqa kómir tóńireginde týyndap otyrǵan problemalardy sheshýdi tapsyrdy, dep habarlaıdy Qamshy.kz aqparat agenttigi QazAqparatqa silteme jasap. 

Otyrys barysynda Premer-Mınıstr kómirli óńir Qaraǵandynyń ózinde uzyn-sonar kezektiń oryn alǵanyn aıtyp, onyń sebebin óńir basshysy Erlan Qoshanovtan suraǵan edi.

«Áleýmettik nysandardy kómirmen qamtamasyz etýde oblysta problema joq. Kómir tolyq kólemde jetkizilgen. Alaıda halyqty kómirmen qamtamasyz etýdegi  dúrbeleń saqtalýda. Osy jyldarǵa deıin oblys turǵyndary kómirdi qazan aıynda satyp alatyn. Biraq bıyl jylytý maýsymy 27 qyrkúıekte bastalyp ketti», - dedi ol.

Osy oraıda onyń sózin bólgen Baqytjan Saǵyntaev: «Erlan Jaqanuly, sizshe, sonda halyq kináli bolǵany ma? Olar buryn qazanda alsa, bıyl qyrkúıekten bastap, kómir satyp ala bastaǵan. Solaı bolǵany ma?», - dedi Baqytjan Saǵyntaev.

Al Erlan Qoshanov óńirdegi aýa temperatýrasynyń kúrt tómendeý saldarynan kómirge suranys artyp, dúrbeleń bastalyp otyrǵanyn aıtyp aqtaldy.

«Baqytjan Ábdiruly, halyq aldyn ala kómir satyp almaıdy. Sebebi, onda jatyp qalǵan  kómirdiń sapasy tómendeıdi. Biz tıisti saraptama júrgizgen de edik. Jyl saıyn qazan aıynda  kómirdi satyp alatynbyz. Osy jyly 27 qyrkúıekte jylytý maýsymy bastalyp otyr. Biraq kómir óndirýde problema joq. Aǵymdaǵy jyldyń 9 aıynda 22 mln tonna kómir óndirilip, ótken jyldyń sáıkes kezeńimen salystyrǵanda 1,6 mln tonnaǵa artyq boldy», - degen Qaraǵandy oblysynyń ákimi uzyn-sonar kezekte turǵandardyń 50 paıyzyn kórshi oblystarynyń turǵyndary quraıtyndyǵyn aıtty.

Osydan keıin Baqytjan Saǵyntaev oǵan kómir máselesin qatań baqylaýda ustaýdy tapsyrdy.