Búgin QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysy barysynda sıfrlyq ekonomıkaǵa mamandar daıarlaý sharalary talqylandy, dep jazady Qamshy.kz aqparat agenttigi.
Bilim jáne ǵylym mınıstri Erlan Saǵadıev orta bilim berýdegi AT-quzyrettilikti arttyrý aıasynda mektepterde «Robot tehnıkasy» tańdamaly kýrsy engiziletinin baıandady. 2016–2017 oqý jylynda robot tehnıkasy boıynsha 372 úıirme, sondaı-aq 397 mektepte 397 robot tehnıkasy kabıneti ashyldy. 2 500 ınformatıka muǵalimi robot tehnıkasy, robot tehnıkasyn júzege asyrý jaǵdaıynda AT boıynsha teorıalyq jáne synyptan tys jumystardy uıymdastyrýdyń erekshelikteri boıynsha biliktilikti arttyrý kýrstarynan ótti.
Tehnıkalyq jáne kásiptik bilim berýdegi AT-quzyrettilikti arttyrý aıasynda aǵymdaǵy jyly jumys berýshilerdiń usynystary boıynsha «Aqparattyq qaýipsizdik» jańa mamandyǵy qosyldy. Bul mamandyq boıynsha qabyldaý 2018 jyldyń 1 qyrkúıeginen bastalady.
Qazirgi ýaqytta Tehnıkalyq jáne kásiptik bilim berý uıymdarynda eki mamandyq aıasynda «Informatıka jáne esepteý tehnıkasy» baǵyty boıynsha oqytý júrgizilip jatyr: «Esepteý tehnıkasy jáne baǵdarlamalyq qamtamasyz etý (túrleri boıynsha)», ol segiz quzyretten turady, jáne «Aqparattyq júıeler (qoldaný salalary boıynsha)» — úsh quzyret.
Aqparattyq teńsizdikti azaıtý baǵdarlamasy aıasynda 9,7 myńnan astam oqytýshy men óndiristik oqytý sheberleri biliktilikti arttyrýdan ótti. «Nurecom LTD» kompanıasynyń demeýshilik kómegimen Pasco, Boxford, Promethean, LG sheteldik kompanıalarynda 360 óndiristik oqytý sheberi men arnaıy pánderdiń oqytýshylary biliktilikti arttyrýdan ótti jáne halyqaralyq sertıfıkat aldy.
Barlyq 16 óńirde ınteraktıvti bilim berý jabdyǵyn qoldaný boıynsha oqý ortalyqtary quryldy, onda 3 564 astam ınjenerlik-pedagogıkalyq qyzmetker biliktilikti arttyrýdan ótti.
Barlyǵy RKK Rogaland (Norvegıa), In Went (Germanıa), GTZ (Germanıa) halyqaralyq jobalary aıasynda 360 pedagogıkalyq qyzmetker jetekshi sheteldik oqý ortalyqtarynda biliktilikterin arttyrdy.
Sondaı-aq, óndiristik oqytý oqytýshylary men sheberleri onlaın rejıminde kásibı sheberlik sabaqtaryn júrgizedi. Portalda (elp.kz) onlaın sabaqtardyń, TjáneKB oqytýshylarynyń málimetter bazasy quryldy.
AT-quzyrettilikti arttyrý salasynda joǵary bilim berýde kadrlar daıarlaý kelesi mamandyqtar boıynsha júrgiziledi: 84 JOO-da «Informatıka», «Aqparattyq júıeler», «Avtomattandyrý jáne basqarý», «Esepteý tehnıkasy jáne baǵdarlamalyq qamtamasyz etý», «Matematıkalyq jáne kompúterik modeldeý», «Radıotehnıka, elektronıka jáne telekomýnıkasıa» jáne jeti JOO-da «Aqparattyq qaýipsizdik júıeleri».
«Bolashaq» stıpendıasy aıasynda «Aqparattyq tehnologıalar jáne júıeler» baǵyty boıynsha 951 adam jáne túlekterdiń jalpy sanynyń 10,1% oqytýdan ótti, onyń ishinde baǵdarlamalar boıynsha: bakalavrıat — 510, mamandanym — 20, magıstratýra — 386, doktorantýra — 6, taǵylymdama — 29. Qazirgi ýaqytta 59 adam «Aqparattyq tehnologıalar jáne júıeler» baǵyty boıynsha AQSH, Ulybrıtanıa, Irlandıa, Nıderlandy, Sıngapýr, Avstralıa, Kanada, Germanıa, Japonıa jáne Reseıde magıstratýra baǵdarlamalary boıynsha oqyp jatyr.
2016 jyldan bastap bakalavrıat standartyna jalpy bilim berý pánderi sıkliniń mindetti komponentine «Aǵylshyn tilinde aqparattyq-kommýnıkasıalyq tehnologıalar» páni engizildi. Osyǵan baılanysty atalǵan pán boıynsha bazalyq oqýlyq ázirlendi. JOO-lardyń ınformatıka boıynsha úsh júz oqytýshysy kúsheıtilgen tildik kýrstardan ótti.
JOO-lardyń bilim berý baǵdarlamalaryn JOO-lar árekettegi standarttar aıasynda ózderi ázirleıdi. Sonymen qatar, bilim berý baǵdarlamalaryn ázirleýge sheteldik seriktes-JOO-lar jáne jumys berýshiler tartylady. 2015 jáne 2016 jyldary IIDMB-ge qatysýshy 11 bazalyq JOO 48 ınovasıalyq bilim berý baǵdarlamasyn ázirledi.
2017–2018 oqý jylynyń basynan beri barlyq JOO-lar AT salasyndaǵy 10 bekitilgen kásiptik standarttardy eskere otyryp, bilim berý baǵdarlamalaryn jańartty. Sondaı-aq, onlaın rejımde oqytý keńinen taralyp keledi.
