Qyrǵyzstannyń ortalyq saılaý komısıasy jarıalaǵan sońǵy málimet boıynsha 1 482 891 saılaýshynyń daýysy eseptelip boldy. Resmı aqparatqa sáıkes kandıdattardyń ishinde eń kóp daýys jınaǵan tórttikti 54,04 paıyz qoldaýǵa ıe bolǵan Sooronbaı Jeenbekov bastap tur, dep Qamshy.kz aqparat agenttigi Azattyqqa silteme jasap habarlaıdy.

Ekinshi orynda – saılaýshylardyń 33,65 paıyz daýysyn alǵan Ómirbek Babanov. Opozısıalyq saıasatker Adahan Madýmarov – 6,54 paıyz kórsetkishpen úshinshi orynda. Tórtinshi nátıje ıelengen Temir Sarıevtiń enshisinde 2,5 paıyz daýys bar. Madýmarovtan basqa qalǵan úsh kandıdat kezinde premer-mınıstr qyzmetin atqarǵan. Saılaýshylardyń 0,67 paıyzy barlyq kandıdattarǵa qarsy daýys bergen. Prezıdent saılaýyna jalpy sany 11 kandıdat qatystyryldy.

Qyrǵyzstannyń zańy boıynsha prezıdent saılaýynyń alǵashqy týrynda saılaýshylardyń jartysynan astamynyń daýysyn alǵan kandıdat birden jeńimpaz dep jarıalanady. Jeenbekov Qyrǵyzstannyń ońtústigindegi Osh oblysynda 72,3 paıyz daýys jınasa, onyń basty qarsylasy Babanov soltústiktegi Talas oblysynda 85 paıyz qoldaýǵa ıe bolǵan.

Qyrǵyzstannyń merzimi aıaqtalyp jatqan prezıdenti Almazbek Atambaev óziniń qol astynda úkimet basqarǵan Sooronbaı Jeenbekovti qoldap kelgen bolatyn. Al Ómirbek Babanov saılaý aldynda Qazaqstan prezıdentimen kezdeskeni úshin Atambaevtyń synyna ushyraǵan.