Qyrǵyzstan prezıdenti saılaýynda alda kele jatqan úmitker Sooronbaı Jeenbekov daýys berý aıaqtalǵan soń Bishkekte ótken baspasóz konferensıasynda Qyrǵyzstan men Qazaqstan arasyndaǵy sońǵy oqıǵalarǵa qatysty jýrnalıser suraǵyna jaýap berdi, dep Qamshy.kz aqparat agenttigi Azattyqqa silteme jasap habarlaıdy.
Jeenbekov memleketter bir-birine "qurmetpen qaraýy tıis" ekenin, sonda ǵana barlyq másele ózdiginen sheshile beretinin aıtty. "Bul ýaqytsha nárse, bul da sheshiledi dep oılaımyn" dedi Jeenbekov.
"Biz barlyǵyna qurmetpen qaraımyz, ásirese kórshilerimizge. Osy qarym-qatynasty jalǵastyra beremiz.
"Qazaqstan prezıdenti Nursultan Nazarbaevqa degen kózqarasyńyz qandaı?" degen saýalǵa Jeenbekov "Ol (Nazarbaev - red.) - bizdiń kórshiles baýyrlas memlekettiń basshysy. Biz yntymaqtastyq ornatqan barlyq memleketke, prezıdentke qurmetpen qaraımyz" dedi.
Qyrǵyzstannyń ortalyq saılaý komısıasy jarıalaǵan sońǵy málimet boıynsha 1 482 891 saılaýshynyń daýysy eseptelip boldy. Resmı aqparatqa sáıkes kandıdattardyń ishinde eń kóp daýys jınaǵan tórttikti 54,04 paıyz qoldaýǵa ıe bolǵan Sooronbaı Jeenbekov bastap tur. Ekinshi orynda - saılaýshylardyń 33,65 paıyz daýysyn alǵan Ómirbek Babanov. Opozısıalyq saıasatker Adahan Madýmarov - 6,54 paıyz kórsetkishpen úshinshi orynda. Tórtinshi nátıje ıelengen Temir Sarıevtiń enshisinde 2,5 paıyz daýys bar. Madýmarovtan basqa qalǵan úsh kandıdat kezinde premer-mınıstr qyzmetin atqarǵan. Saılaýshylardyń 0,67 paıyzy barlyq kandıdattarǵa qarsy daýys bergen. Prezıdent saılaýyna jalpy sany 11 kandıdat qatystyryldy.
Qazaqstan men Qyrǵyzstan shekarasynda 10 qazannan beri tekserý kúsheıip, Qazaqstanǵa qaraı ótý qıyndaǵan. Eki el shekarasyndaǵy ótkizý beketterinde kezek paıda bolǵan. Qyrǵyzstan memlekettik shekara qyzmetiniń sońǵy málimeti boıynsha, shekaradaǵy jaǵdaı áli ońalmaı tur. Kópshiligi bul jaǵdaıdy Qyrǵyzstannyń is basyndaǵy prezıdenti Almazbek Atambaevtyń 7 qazanda Qazaqstan bıligine qarata aıtqan synymen baılanystyrady.
13 qazanda Atambaev "3 myń jyldyq tarıhy bar halyqtyń úsh kúndik blokadadan qoryqpaıtynyn" málimdegen. Birer kúnnen soń ol eger qyrǵyz-qazaq shekarasyndaǵy jaǵdaı ózgermese Eýrazıa ekonomıkalyq odaǵynyń kezekten tys jıynyn shaqyrýǵa quqyǵy baryn eskertken.
