Nursultan Nazarbaev Energetıka mınıstri Qanat Bozymbaevty qabyldady, -dep Qamshy.kz aqparat agenttigi Aqordaǵa silteme bere otyryp jazady.

Kezdesý barysynda mınıstr  Elbasyna munaı óńdeýshi zaýyttardyń jańa zamanǵa saı ózgerýi barysyndaǵy janar-jaǵarmaı materıaldary naryǵynyń jaǵdaıyn túsindirdi. Elbasy «Qazaqstandaǵy munaı jetispeýshiligi Energetıka mınıstrliginiń janar-jaǵarmaı materıaldary naryǵyndaǵy sheshimderdi óz ýaqytynda qabyldamaýynan boldy» dedi.

– Energetıka mınıstrligi elimizdiń otyn-energetıka máselelerine, sonyń ishinde ishki naryqty janar-jaǵarmaımen qamtamasyz etýge jaýapty. Elimizde onyń tapshylyǵyna baılanysty oryn alǵan ahýal Úkimet pen Energetıka mınıstrligi tarapynan nemquraılylyq pen jaýapsyzdyqqa jol berilgenin kórsetip otyr. Siz bıylǵy mamyr aıynda munaı óńdeý zaýyttaryna jóndeý jumystaryn júrgizý kestesin bekittińiz. Kúzde úsh zaýyttyń ekeýi jóndeý úshin toqtatylatynyn bildińiz. Mundaı jaǵdaı jyl saıyn qaıtalanyp keledi. Sony bile tura, aldyn-ala daıyndalyp, halyqty qamtamasyz etý úshin qajetti kólemde janar-jaǵarmaı jetkizýge tıis edińiz. Olaı bolmady, – dedi Qazaqstan Prezıdenti.

Sondaı-aq, Elbasy mınıstrliktiń janar-jaǵarmaı naryǵyndaǵy ahýaldy turaqtandyrýǵa baǵyttalǵan buǵan deıingi sharalarynyń tıimdiligi tómen bolǵanyn atap ótti.

– Siz usynǵan jaqsy bastamalar az emes. Olar meniń tarapymnan da, Úkimet tarapynan da qoldaý taýyp keledi. Janarmaı tapshylyǵyn boldyrmaý úshin baǵany memlekettik retteýden bas tartý usynyldy. Alaıda, naryqta taǵy da janar-jaǵarmaı jetispeýshiligi oryn aldy. Osyǵan baılanysty, Úkimettiń usynysy boıynsha sizge sógis jarıaladym. Bul – qyzmetten bosatylǵanmen birdeı, – dedi Memleket basshysy.

Sondaı-aq Qanat Bozymbaev Qazaqstan Prezıdentine Pavlodar jáne Atyraý munaı óńdeý zaýyttaryn jańǵyrtý jumystarynyń barysy týraly málimdedi.

– Eki munaı óńdeý zaýytyn jetildirip, jańǵyrtý bıyl aıaqtalady. Qarasha aıynda Pavlodardaǵy zaýytty iske qosý josparlanyp otyr. Atyraýdaǵy munaı óńdeý zaýytyndaǵy jumystardy osy jyldyń 16 jeltoqsanyna deıin aıaqtaý kózdelgen. Munda munaı ónimderiniń kólemin arttyrýǵa jáne olardyń sapasyn jaqsartýǵa múmkindik beretin katalıtıkalyq krekıng qurylǵysy birinshi ret paıdalanylatyn bolady.     

Q.Bozymbaev Memleket basshysyna Shymkenttegi munaı óńdeý zaýytynda da joǵary oktandy benzın shyǵarýǵa arnalǵan katalıtıkalyq krekıng qurylǵysyn salý josparlanyp otyrǵany týraly málimdedi.   

Energetıka mınıstri kelesi jyly Qazaqstan naryǵy joǵary sapaly janarmaımen, sonyń ishinde avıasıalyq janarmaımen qamtamasyz etiletinin aıtty.