Qazaqstan Respýblıkasynyń Din isteri jáne azamattyq qoǵam vıse-mınıstri Berik Aryn Almaty oblysyna jumys sapary barysynda «Zaıyrly qoǵam jáne joǵary rýhanıat –halyq birliginiń negizi» taqyrybynda respýblıkalyq semınar-keńestiń otyrysyna qatysty. Bul týraly Qamshy.kz aqparat agenttigi habarlaıdy.
Sharaǵa ortalyq jáne jergilikti memlekettik organdardyń ókilderi, JOO-nyń rektorlary, dinı birlestikter men etno-mádenı ortalyq ókilderi, barlyǵy 450 adam qatysty.
Berik Aryn óz sózinde Qazaqstan Respýblıkasynyń din salasyndaǵy memlekettik saıasatynyń 2017 – 2020 jyldarǵa arnalǵan tujyrymdamasynyń, sondaı-aq, «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Zań jobasynyń negizgi basymdyqtary týraly áńgimeledi.
«Dinı saladaǵy turaqtylyq - qoǵamdyq-saıası jaǵdaı men memlekettiń qaýipsizdigi úshin mańyzdy. Eldegi turaqtylyq memlekettik saıasattyń sátti júzege asyrylýyna negiz bolady, sondaı-aq, eldiń odan ári damýynyń vektory aıqyndalady», - dedi vıse-mınıstr.
Jumys sapary barysynda vıse-mınıstr Atyraý, Aqtóbe, Qostanaı, Aqmola, Pavlodar, Qyzylorda, Jambyl, Batys Qazaqstan, Shyǵys Qazaqstan, Ońtústik Qazaqstan oblystary men Almaty qalasynyń din isteri basqarmalarynyń basshylarymen, din salasyndaǵy máselelerdi zertteý ortalyqtarynyń dırektorlarymen keńes ótkizdi. Sondaı-aq, jıynǵa quqyq qorǵaý organdarynyń ókilderi men lańkestikke qarsy komısıalardyń jaýapty mamandary qatysty.
Sondaı-aq, vıse-mınıstr dinı máseleler boıynsha Respýblıkalyq aqparattyq-túsindirý toptarynyń (RATT) jumysyn saralap, osynyń aıasynda QMDB aımaqtyq fılıaldarynyń ımamdarymen, óńirlerdegi din isteri jónindegi basqarma basshylarymen jáne aımaqtyq problemalardy zertteý ortalyqtarynyń dırektorlarymen kezdesýler ótkizdi.
Berik Aryn qatysýshylarǵa dinı saladaǵy memlekettik saıasatty maǵynaly túsindirýdiń, eldiń damýynyń zaıyrly prınsıpterin jáne konfesıaaralyq kelisimdi nasıhattaýdyń, dinı ekstremızm men radıkalızmniń aldyn-alý jáne halyqtyń kóp shoǵyrlanǵan aýmaǵynda radıkaldy ıdeologıaǵa qarsy ımýnıtetti qalyptastyrýdyń mańyzdylyǵyn atady.
