Alash avtonomıasy jáne Alashorda úkimetiniń 100 jyldyǵyna oraılastyrylǵan shara Astana qalasynyń ákimdigi, Tilderdi damytý basqarmasynyń uıymdastyrýymen «Bolashaqqa baǵdar: rýhanı jańǵyrý» baǵdarlamasy aıasynda ótpek. Konferensıanyń maqsaty: Alash avtonomıasynyń, Alashorda úkimetiniń, «Alash» partıasynyń ıdeıalaryn jáne eldi táýelsizdik muratyna uıystyrǵan Alash arystarynyń muralaryn nasıhattaý, memleket tarıhyn kópshilikke dáripteý, patrıottyq qoǵamdy qalyptastyrý.
Alqaly jıyn barysynda 1917 jylǵy jalpy qoǵamdyq-saıası jaǵdaı; Alashorda kósemderiniń qyzmeti; Alash Renesansy jáne ulttyq rýhanı jańǵyrý taqyryptary boıynsha baıandama jasalyp, Elbasy alǵa tartqan «Rýhanı jańǵyrý» ıdeıasy men Alashtyń negizgi ustanymdary arasyndaǵy sabaqtastyq kórsetiletin bolady.
Konferensıanyń jumysyna belgili alashtanýshylar, ǵalymdar, qalamgerler, depýtattar, memlekettik mekemelerdiń, saıası partıalardyń, mýzeı-kitaphanalardyń, úkimettik emes uıymdar men jastar qoǵamdyq birlestikteriniń, oqý oryndary men mektepterdiń jáne buqaralyq aqparat quraldarynyń jetekshileri men ókilderi, jas ǵalymdar men mamandar, oqytýshylar men stýdentter qatysady dep kútilýde.
