Búgin QR Parlamenti Májilisiniń jalpy otyrysynda depýtattar QR qarjy mınıstri Baqyt Sultanovtan jumsalǵan qarjynyń esebin surap, suraqtyń astyna aldy. Sebebi, 2014 jyly Ulttyq qordan kvazımemlekettik sektorǵa bólingen 680 mlrd teńgeniń 7,5 mıllıardy ǵana Ulttyq qorǵa qaıtarylǵan, dep Qamshy.kz aqparat agenttigi Baq.kz saıtyna silteme jasap habarlaıdy.

Jalpy otyrysta «QR-nyń keıbir zańnamalyq aktilerine búdjet zańnamasyn jetildirý máseleleri boıynsha ózgerister men tolyqtyrýlar engizý týraly» QR zańy jobasynyń ekinshi oqylymy ótti. Atalǵan zań jobasyn QR Parlamenti Májilisi Qarjy jáne búdjet komıtetiniń múshesi Omarhan Óksikbaev tanystyrdy. Keıin halyq qalaýlylary ózderin tolǵandyrǵan máselelerge baılasynty Úkimet múshelerine suraq qoıdy.

«Nege kvazımemlekettik sektorǵa qomaqty qarjy quıylady da, Ulttyq qorǵa mardymsyz 7,5 mlrd teńge qaıtarylady? Qarjy mınıstrliginiń málimetine súıensek, barlyǵy negizgi kompanıalar, onyń ishinde Qazaqstannyń turǵyn úı qurylys jınaq banki, «Eır Astana», «QTJ» bar. Biraq olar 2020 jylǵa deıin jekeshelendirilmek», - dep saýal joldady mınıstrge QR Parlamenti Májilisiniń depýtaty Maıra Aısına.

Suraqqa qarjy mınıstri Baqyt Sultanov jaýap berdi.

«Qazirgi tańda keshendi túrde 113 mlrd teńgege 291 obekt salyndy. Onyń ishinde respýblıkalyq búdjet esebinen 23 obekt turǵyzyldy. Oǵan bólingen qarjy 8 mlrd teńgeden asady. Komýnaldy menshikke 162 obekt, qarjy kólemi 33 mlrd teńge, al kvazımemlekettik sektorǵa 106 obekt satyldy. Bul 70 mlrd teńgeden astam. Iaǵnı eger satylǵan obekt respýblıka menshiginde bolsa, qarjy respýblıkalyq búdjetke túsedi. Al obekt jergilikti menshikte bolsa, aqsha jergilikti búdjetke túsedi. Sondaı-aq, ulttyq kompanıalardy jáne olardyń quramyna kiretin uıymdardy satýdan túsken qarjy tıisti kompanıalardyń esebine tústi. Bıyl kóktemde búdjet zańyna ózgerister engizildi. Sizder jekeshelendirýden túsken qarjy Ulttyq qorǵa tússin degen tapsyrmany bilesizder. Qazirgi tańda Úkimettiń qaýlysy pysyqtalyp jatyr», - dedi mınıstr.

Alaıda bul jaýap QR Parlamenti Májilisiniń tóraǵasy Nurlan Nyǵmatýlınge unamaı qaldy.

«Jaýabyńyzdan túk túsinbedim! Mınıstr myrza, siz suraqqa jaýap berińiz nemese jaýap bermeı-aq qoıyńyz. 2014 jyldan beri Ulttyq qordaǵy 680 mlrd teńge kvazımemlekettik sektorǵa bólindi. Tıisti málimetter boıynsha jekeshelendirýden (Ulttyq qorǵa – avtor) 7,5 mlrd teńge qaıtarylǵan. Úkimettegi áriptester, búgingi jumys kúnimiz uzaqqa sozylatyn túri bar. Sondyqtan suraqtar boıynsha naqty jumys isteıik», - dedi ol.

Eskertýden keıin Baqyt Sultanov suraqqa naqty jaýap berýge tyrysty.

«Respýblıkalyq búdjetten bólingen qarjy, onyń ishinde daǵdarysqa qarsy baǵdarlamalar men ınfraqurylymdy damytýǵa Ulttyq qordan bólingen transfertter naqty jobalarǵa bólindi. Al profıldi emes aktıvter, ulttyq holdıńter men kompanıalardyń quramyndaǵy uıymdar jekeshelendirilgen kezde Ulttyq qordan bólingen qarajat ınfraqurylymdy damytýǵa baǵyttalǵan jobalarda jumys isteýde».

Mınıstrdiń jaýabyna Nurlan Nyǵmattýlınniń kóńili tolǵandaı boldy.

«Suraqqa jaýap berdińiz. Qurylymdy túsindirdińiz», - dedi QR Parlamenti Májilisiniń tóraǵasy.