Qazirgi ýaqytta álemde túrli qaqtyǵystar oryn alýda. Olardyń paıda bolyna senimniń joqtyǵy sebep. Bul týraly «Mádenıet arqyly beıbitshilikke qol jetkizý» halyqaralyq qaýymdastyǵy uıymdastyrǵan «Rýhanı jańǵyrý – bereke-birlik joly» halyqaralyq konferensıasynda QR Din isteri jáne azamattyq qoǵam mınıstri Nurlan Ermekbaev málimdedi dep habarlaıdy Qamshy.kz aqparat agenttigi.  

Halyqaralyq konferensıa  ǵylym jáne mádenıet salasynyń ókilderi, din kóshbasshylary men ártúrli elderdiń memlekettik qaıratkerleri óz oılaryn ortaǵa salatyn ashyq dıalog alańyna aınaldy.   Qatysýshylar álemdik qoǵamdastyqtyń qazirgi zamanǵy problemalary men álemdik qaýymdastyqtyń zamanaýı qaýip-qaterlerin rýhanı jańǵyrý joly arqyly salmaqty túrde sheshý máselelerin talqylady.

Konferensıa barysynda sóz sóılegen Nurlan Ermekbaev qazirgi kúni jahanda kóptegen qaqtyǵystardyń oryn alyp otyrǵanyn atap ótti. Mınıstrdiń aıtýynsha túrli janjaldardyń oryn alýyna qoǵamda senimniń bolmaýy sebep.  Senim bul salıqalı uǵym.  Kez-kelgen ulttyń mádenıetine,  ǵylymyna jáne halyqtyń rýhanı qajettilikterine  qurmet  kórsetiletin  jerde ǵana senim paıda bolady. Bul úshin ıntellektýaldyq jáne zıatkerlik ortany  ıntegrasıalyq úderisterge tartý úshin jańa praktıkalyq sharalar qajet. Sondyqtan mınıstr jyl saıynǵy konferensıany ótkizý osy mindetti sheshý úshin tıimdi alań bolatynyn atap ótti.

Konferensıa aıasynda Eýrazıa halyqtary Assambleıasynyń keńeıtilgen otyrysy ótti. Eýrazıa halyqtarynyń Assambleıasy - eýrazıalyq ıntegrasıa ıdeıalaryn damytý turǵysynda halyqtyq dıplomatıasynyń quralyna aınalǵan Máskeýde qurylǵan halyqaralyq qoǵamdyq qozǵalys bolyp tabylady.

«Kóptegen saıasatkerler Qazaqstan Prezıdentin eýrazıashyldyqtyń ıdeology dep ataıdy.  Memleket basshysynyń  «Bolashaqqa baǵdar: Rýhanı jańǵyrý» maqalasynda kórsetilgen baǵdarlamalar, mindetter men jobalar, onyń ishinde eýrazıalyq yntymaqtastyq salasyndaǵy bastamalar  ózekti bolyp tabylady. Bul rette, «Qazirgi jahandyq álemdegi qazaqstandyq mádenıet» baǵdarlamasy aıryqsha mańyzǵa ıe...  «Týǵan-Jer» baǵdarlamasy   Assambleıanyń qyzmetine de oń áserin tıgizedi.  Baǵdarlama patrıottyq tárbıe men azamattyq belsendilikti damytýǵa baǵyttalǵan » - dedi Nurlan Ermekbaev.

Mınıstrdiń  aıtýynsha, Assambleıa tarapy  úkimettik emes uıymdardyń jumysyna qyzyǵyýshylyq tanytýy kerek.  Din isteri jáne azamattyq qoǵam mınıstrligi «Týǵan jer» baǵdarlamasynyń  aıasynda «Atameken» ataýymen biriktirilgen is-sharalarynyń oryndalýyna jaýapty. Osyǵan baılanysty Nurlan Ermekbaev Eýrazıa halyqtary assambleıasynyń qatysýshylaryn bizdiń jobalarymyzǵa qyzyǵýshylyq tanytyp, birlese jumys isteýge shaqyrdy.

Esterińizge sala keteıik,  atalǵan halyqaralyq shara Qazaqstandaǵy rýhanı kelisim kúni merekesi aıasynda ótkizilip otyr. Konferensıaǵa tanymal mádenıet jáne ǵylym qaıratkerleri - Oljas Súleımenov, Iosıf Kobzon, Tólegen Muhamedjanov, Valerıa Porohova, sondaı-aq dinı birlestikterdiń basshylary men úkimettik emes uıymdardyń ókilderi qatysty.