Rásim barysynda Memleket basshysy Nursultan Nazarbaevqa Aýǵanstan Islam Respýblıkasynyń Tótenshe jáne ókiletti elshisi Kadam Shah Shahım, Polsha Respýblıkasynyń Tótenshe jáne ókiletti elshisi Selım Hazbıevıch, Kanadanyń Tótenshe jáne ókiletti elshisi Nıkolá Brýsso, Fınlándıa Respýblıkasynyń Tótenshe jáne ókiletti elshisi Mıkko Kıvıkoskı, Belgıa Koróldiginiń Tótenshe jáne ókiletti elshisi Aleksı de Krombrúghe de Pıkendael, Fransıa Respýblıkasynyń Tótenshe jáne ókiletti elshisi Fılıpp Martıne, Estonıa Respýblıkasynyń Tótenshe jáne ókiletti elshisi Heıtı Máemees senim gramotasyn tapsyrdy dep habarlaıdy Qamshy.kz aqparat agenttigi Aqorda baspasóz qyzmetine silteme otyryp.
Memleket basshysy rásimge qatysýshylarǵa arnalǵan sózinde olardyń dıplomatıalyq mısıalary Qazaqstannyń jańa damý kezeńine tuspa-tus kelip otyrǵanyn atap ótti.
– Biz Qazaqstannyń Úshinshi jańǵyrýyn iske asyrýǵa kiristik. «Rýhanı jańǵyrý» atty aýqymdy baǵdarlama árbir azamatymyz úshin erekshe mánge ıe bolýda, – dedi Qazaqstan Prezıdenti.
Nursultan Nazarbaev Qazaqstanǵa ekonomıkalyq jáne ımıjdik turǵydan oń áseri bolǵan Astanada ótken birqatar halyqaralyq is-sharalardyń nátıjelerine toqtaldy. Atap aıtqanda, halyqaralyq «EKSPO-2017» mamandandyrylǵan kórmesi, Shanhaı yntymaqtastyq uıymynyń samıti, Astanadaǵy Tómen baıytylǵan ýran bankiniń ashylýy jáne Islam yntymaqtastyǵy uıymynyń Ǵylym jáne tehnologıalar jónindegi samıti ótti.
Memleket basshysy Qazaqstannyń BUU-nyń Qaýipsizdik Keńesiniń turaqty emes múshesi retinde jahandyq beıbitshilik pen qaýipsizdikti qamtamasyz etý isine qosyp otyrǵan úlesin erekshe atap ótti.
Qazaqstan Prezıdenti elimizdiń sheteldik áriptestermen saýda-ekonomıkalyq qarym-qatynastardy nyǵaıtýǵa múddeli ekenin aıtyp, ınvestısıalyq ahýaldy jaqsartý úshin qabyldanyp jatqan sharalarǵa toqtaldy.
– Qazaqstanda Eýrazıalyq ekonomıkalyq odaqqa, Ortalyq Azıa men Qytaı naryǵyna shyǵatyn ınfraqurylym qalyptasty. Investorlarmen jáne bıznespen ózara tıimdi is-qımyl ornatý maqsatymen «Qazaq Invest» jáne «Qazaq Eksport» ulttyq kompanıalary quryldy. «Astana» halyqaralyq qarjy ortalyǵy, «Jasyl» tehnologıalardy damytý jónindegi BUU-nyń halyqaralyq ortalyǵy jáne İT-startaptardyń halyqaralyq tehnoparki jumysyn bastaýda, – dedi Nursultan Nazarbaev.
Memleket basshysy Qazaqstan men Aýǵanstan arasyndaǵy ózara saıası is-qımyldyń jandanǵanyna nazar aýdardy.
– Bıyl biz Ǵanı myrzamen Shanhaı yntymaqtastyq uıymy men Islam yntymaqtastyǵy uıymynyń jıyndarynda kezdestik. Ózara saýda kólemi jarty mıllıard dollarǵa jetip, Almaty men Kabýl qalalarynda Saýda úıleri ashyldy. Biz tehnıkalyq jáne gýmanıtarlyq kómek kórsetýdi jalǵastyratyn bolamyz. Aýǵanstannyń qaýipsiz ári ornyqty damýy – óńirimizdegi beıbitshiliktiń, turaqtylyq pen órkendeýdiń kepili, – dedi Qazaqstan Prezıdenti.
Nursultan Nazarbaev Qazaqstan Kanadamen kóp salaly yntymaqtastyqty odan ári nyǵaıtýǵa nıetti ekenin aıtty.
– Ótken jyly «G-20» samıtindegi kezdesýde Premer-Mınıstr Djastın Trúdomen túrli saladaǵy baılanystardy nyǵaıtý jóninde ýaǵdalastyq. Bıylǵy maýsym aıynda Astanada «Qazaqstan-Kanada» iskerlik keńesiniń ótýi – sol ýaǵdalastyqtyń naqty iske asyrylýynyń kórinisi, – dedi Memleket basshysy.
Qazaqstan Prezıdenti Belgıamen aradaǵy is-qımyl ózara qurmet pen senim qaǵıdattaryna negizdelgenin atap ótti.
– Meniń 2014 jylǵy qazandaǵy Brússelge jumys saparym jáne Joǵary Mártebeli Koról Fılıppen ótken kelissózder ekijaqty ári kópjaqty yntymaqtastyqtyń ózekti máseleleri jóninde pikir almasýǵa múmkindik berdi. Belgıa kapıtaly men tehnologıalaryn Qazaqstan naryǵyndaǵy birlesken jobalarǵa belsendi túrde tartýdy quptaımyz, – dedi Nursultan Nazarbaev.
Sondaı-aq, Memleket basshysy Polsha Respýblıkasy Ortalyq jáne Shyǵys Eýropadaǵy Qazaqstannyń negizgi seriktesi ekenin aıtty.
– 2016 jylǵy tamyzdaǵy Varshavaǵa memlekettik saparymnyń jáne Polsha Prezıdenti Andjeı Dýdanyń bıylǵy qyrkúıek aıynyń basyndaǵy Qazaqstanǵa memlekettik saparynyń qorytyndylaryn joǵary baǵalaımyn. Ótken kelissózder Qazaqstan men Polsha arasyndaǵy dıalogtyń áleýeti zor ekenin dáleldep, ózara tıimdi kóptegen jobalarǵa jol ashty, – dedi Qazaqstan Prezıdenti.
Sonymen qatar, Memleket basshysy elimizdiń Fınlándıamen ózara is-qımyl deńgeıiniń joǵary ekenin atap ótti.
– Bizdiń el men Fınlándıany dástúrli dostyq qatynastar men kóp jyldan bergi yntymaqtastyq baılanystyryp keledi. Astana men Helsınkı arasynda tikeleı áýe reısiniń ashylýy aıtýly oqıǵa boldy. «Jasyl» tehnologıalardy damytý jónindegi ortalyq quryldy, Qazaqstanda jańa fın kásiporyndary ashylýda. Joǵary jáne úkimetaralyq deńgeıdegi ýaǵdalastyqtardyń odan ári iske asyrylýyn qamtamasyz etý qajet, – dedi Nursultan Nazarbaev.
Memleket basshysy Qazaqstan men Fransıanyń ózara tıimdi yntymaqtastyǵyna toqtaldy.
– Mashına jasaý, ǵarysh, metalýrgıa, kólik jáne basqa da salalarda tehnologıalyq jobalar ázirlendi. Elderimizdiń ıgiligi úshin Fransıa Prezıdenti Makronmen jemisti baılanysty damytýǵa nıettimiz, – dedi Qazaqstan Prezıdenti.
Nursultan Nazarbaev Estonıamen qarym-qatynasymyz qarqyndy damyp kele jatqanyn atap ótti.
– Biz kólik jáne tranzıt, energetıka, komýnıkasıa jáne tehnologıalar sıaqty perspektıvaly baǵyttar boıynsha birlese jumys jasaýǵa ázirmiz. Eýropalyq odaqta tóraǵalyq etip otyrǵan Estonıa basshylyǵy Qazaqstan men Eýropa seriktestigin ilgeriletýge úles qosady dep oılaımyz, – dedi Memleket basshysy.
Sońynda Nursultan Nazarbaev elshilerdi Qazaqstandaǵy jaýapty dıplomatıalyq qyzmetteriniń bastalýymen taǵy da quttyqtap, jumystaryna tabys tiledi.
